Dag 62 van 365- Numeri 28-30 en Marcus 8:22-38

₁Dan MASRA taigi Moses taki: ₂“Komanderi den Israelitisma taki: ‘Un mus sorgu taki un tyari den ofrandi fu Mi tapu den ten di Mi poti. Dati na a nyanyan nanga den ofrandi di mus bron nanga faya leki wan switismeri gi Mi.

₃Taigi den taki: Disi na san un sa tyari fu bron nanga faya leki wan ofrandi gi MASRA: gi a aladei ofrandi un sa tyari tu skapu fu wan yari. Noti no mus mankeri den skapu. ₄A wan skapu un sa meki klari te mamanten. A trawan sa meki klari te neti e fadon. ₅Makandra nanga den skapu un sa tyari tu kilo fini blon leki graan-ofrandi. A blon disi mus moksi nanga wan liter fu a moro bun oleif-oli. ₆Disi na a ofrandi di mus bron aladei. Na wan ofrandi di mus bron nanga faya leki wan switismeri gi MASRA. Tapu a Sinaibergi un ben leri fa un mus du en. ₇Makandra nanga a ofrandi dati un sa kanti wan liter win gi ibri skapu. Un mus kanti win ini a santa presi leki wan ofrandi gi MASRA. ₈A tra skapu un sa meki klari te neti e fadon. Un mus meki en klari nanga wan graan-ofrandi èn un mus kanti win tu leki wan ofrandi, leki fa un e du te mamanten. Na wan ofrandi di mus bron nanga faya leki wan switismeri gi MASRA.

₉Tapu a sabatdei un sa tyari tu skapu fu wan yari leki wan ofrandi. Noti no mus mankeri den skapu disi. Makandra nanga den skapu un sa tyari fo kilo fini blon leki graan-ofrandi. A blon disi mus moksi nanga oli. Un sa kanti win leki ofrandi tu. ₁₀Disi na a ofrandi di un mus bron ala sabatdei, boiti a ofrandi di mus bron aladei èn boiti a win di mus kanti aladei leki wan ofrandi.

₁₁Na a bigin fu ala mun un sa bron wan ofrandi gi MASRA tu fu tu yongu bulu, wan man skapu nanga seibi skapu fu wan yari. Noti no mus mankeri den skapu disi. ₁₂Makandra nanga ibri bulu un sa tyari siksi kilo blon leki graan-ofrandi. A blon disi mus moksi nanga oli. Makandra nanga a wan man skapu un mus tyari fo kilo blon leki graan-ofrandi. A blon disi mus moksi nanga oli. ₁₃Nanga ibri skapu un mus tyari tu kilo fini blon leki graan-ofrandi. A blon disi mus moksi nanga oli tu. Na wan ofrandi di mus bron leki wan switismeri, wan ofrandi di bron nanga faya gi MASRA. ₁₄A win di mus kanti leki ofrandi sa de: tu liter gi ibri bulu, wan nanga afu liter gi a man skapu nanga afu liter win gi ibri skapu. Disi na a ofrandi di mus bron ala mun fu a yari. ₁₅Moro fara un sa meki wan bokoboko klari leki ofrandi gi MASRA fu kisi pardon fu sondu. A ofrandi disi sa meki klari, boiti a ofrandi di mus bron aladei èn boiti a win di mus kanti aladei leki ofrandi.

₁₆Tapu a di fu tin-na-fo dei fu a fosi mun, un mus meki a paskanyanyan klari gi MASRA. ₁₇Tapu a di fu tin-na-feifi dei fu a mun dati un sa hori wan fesa. Seibi dei langa un sa nyan brede di meki sondro dyesi. ₁₈Tapu a fosi dei wan spesrutu konmakandra sa de. No wan sma sa du hebi wroko a dei dati. ₁₉Dan un sa bron wan ofrandi nanga faya gi MASRA. Un sa bron wan ofrandi fu tu yongu bulu, wan man skapu nanga seibi skapu fu wan yari. Noti no mus mankeri den meti disi. ₂₀Makandra nanga a ofrandi disi un sa tyari wan graan-ofrandi fu fini blon di moksi nanga oli. Siksi kilo gi ibri bulu nanga fo kilo gi a man skapu. ₂₁Gi ibri wan fu den seibi skapu un sa tyari tu kilo blon. ₂₂Moro fara un mus tyari wan bokoboko leki ofrandi fu kisi pardon fu sondu, fu meki en bun nanga Gado. ₂₃Boiti den ofrandi disi un mus tan tyari den ofrandi di mus bron aladei. ₂₄Ala seibi dei un sa tyari a nyanyan disi leki wan ofrandi di bron nanga faya, leki wan switismeri gi MASRA. Boiti den ofrandi disi un sa tan tyari den ofrandi di mus bron aladei nanga a win di mus kanti aladei leki ofrandi. ₂₅Tapu a di fu seibi dei un sa hori wan santa konmakandra. A dei dati un no sa du no wan hebi wroko.

₂₆Un sa hori wan santa konmakandra tapu a dei di un o tyari den fosi nyanyan fu un gron kon. Dati na a dei fu a fesa fu den wiki. Tapu a dei dati un sa tyari wan nyun graan-ofrandi gi MASRA. Un no sa du no wan hebi wroko. ₂₇Tapu a dei dati un sa bron wan ofrandi leki wan switismeri gi MASRA. Leki ofrandi un sa bron: tu yongu bulu, wan man skapu nanga seibi skapu fu wan yari. ₂₈Un sa tyari a graan-ofrandi tu di e go makandra nanga a ofrandi disi. Dati na fini blon di moksi nanga oli. Siksi kilo gi ibri bulu, fo kilo gi a wan man skapu, ₂₉nanga tu kilo gi ibriwan fu den seibi skapu. ₃₀Moro fara un sa tyari wan bokoboko fu meki en bun baka nanga Gado. ₃₁Noti no mus mankeri den meti disi. Boiti den ofrandi disi un sa tan bron a ofrandi di mus bron aladei nanga a graan-ofrandi di e go makandra nanga en.’ ”

₁“Tapu a fosi dei fu a di fu seibi mun un sa hori wan santa konmakandra. A sa de wan spesrutu dei gi unu. Un no sa du no wan hebi wroko. ₂A dei dati un sa bron leki ofrandi nanga wan switi smeri gi MASRA: wan yongu bulu, wan man skapu nanga seibi skapu fu wan yari. Noti no mus mankeri den skapu. ₃Makandra nanga a ofrandi disi un sa tyari wan graan-ofrandi fu fini blon di moksi nanga oli. Siksi kilo gi a bulu, fo kilo gi a man skapu ₄nanga tu kilo gi ibriwan fu den seibi skapu. ₅Moro fara un sa tyari wan bokoboko leki ofrandi fu kisi pardon fu sondu, fu un meki en bun baka nanga Gado. ₆Boiti den ofrandi disi un sa tan tyari a ofrandi di un mus tyari ala mun nanga a graan-ofrandi di e go makandra nanga en, èn un sa tan tyari a ofrandi di mus bron ala dei makandra nanga a graan-ofrandi èn nanga a win di mus kanti leki ofrandi. Un mus du en leki fa un ben leri taki un mus du en. A mus de wan ofrandi di bron nanga faya leki wan switismeri gi MASRA.

₇Tapu a di fu tin dei fu a di fu seibi mun un sa hori wan santa konmakandra. Un sa faste a dei dati èn un no sa du no wan hebi wroko. ₈Tapu a dei dati un sa bron leki ofrandi nanga wan switismeri gi MASRA: wan yongu bulu, wan man skapu nanga seibi skapu fu wan yari. Noti no mus mankeri den skapu. ₉Makandra nanga a ofrandi disi un sa tyari wan graan-ofrandi fu fini blon di moksi nanga oli. Siksi kilo gi a bulu, fo kilo gi a man skapu ₁₀nanga tu kilo gi ibriwan fu den seibi skapu. ₁₁Un sa tyari wan bokoboko leki ofrandi tu fu kisi pardon fu un sondu. Boiti den ofrandi disi, un sa tan tyari a ofrandi fu meki en bun baka nanga Gado, a ofrandi di mus bron aladei, a graan-ofrandi di e go makandra nanga en, nanga a win di mus kanti leki ofrandi.

₁₂Tapu a di fu tin-na-feifi dei fu a di fu seibi mun, un sa hori wan santa konmakandra. Un no sa du no wan hebi wroko. Seibi dei langa un sa hori wan fesa gi MASRA. ₁₃Dan un sa bron wan ofrandi. Un sa bron en nanga faya leki wan switi smeri gi MASRA. Un sa bron tin-na-dri yongu bulu, tu man skapu nanga fotenti skapu fu wan yari. Noti no mus mankeri den meti. ₁₄Makandra nanga a ofrandi disi un sa tyari wan graan-ofrandi fu fini blon di moksi nanga oli. Siksi kilo gi ibriwan fu den tin-na-dri bulu, fo kilo gi den tu man skapu, ₁₅nanga tu kilo gi ibriwan fu den tin-na-fo skapu. ₁₆Un sa tyari wan bokoboko leki ofrandi tu fu kisi pardon fu sondu. Boiti a ofrandi disi un sa tan bron a ofrandi di mus bron aladei tu, a graan-ofrandi di e go makandra nanga en, nanga a win di mus kanti leki ofrandi. ₁₇Tapu a di fu tu dei un sa tyari leki ofrandi twarfu yongu bulu, tu man skapu nanga tin-na-fo skapu fu wan yari. Noti no mus mankeri den skapu disi. Un sa tyari a graan-ofrandi di e go makandra nanga a ofrandi disi, ₁₈nanga a win di mus kanti leki ofrandi gi den bulu, den man skapu nanga den skapu. Un sa du disi leki fa un leri èn un sa poti someni leki fa un ben leri taki un mus du en. ₁₉Un sa tyari wan bokoboko leki ofrandi tu fu kisi pardon fu sondu. Boiti a ofrandi disi un sa tan bron a ofrandi di mus bron aladei, a graan-ofrandi di e go makandra nanga en, nanga a win di mus kanti leki ofrandi. ₂₀Tapu a di fu dri dei un sa tyari erfu bulu, tu man skapu nanga tin-na-fo skapu fu wan yari leki ofrandi. Noti no mus mankeri den skapu disi. ₂₁Un sa tyari a graan-ofrandi di e go makandra nanga a ofrandi disi, nanga a win di mus kanti leki ofrandi gi den bulu, den man skapu nanga den skapu. Un sa du disi leki fa un leri èn un sa poti someni leki fa un ben leri taki un mus du en. ₂₂Un sa tyari wan bokoboko leki ofrandi tu fu kisi pardon fu sondu. Boiti a ofrandi disi un sa tan bron a ofrandi di mus bron aladei, a graan-ofrandi di e go makandra nanga en, nanga a win di mus kanti leki ofrandi. ₂₃Tapu a di fu fo dei un sa tyari tin bulu, tu man skapu nanga tin-na-fo skapu fu wan yari leki ofrandi. Noti no mus mankeri den skapu disi. ₂₄Un sa tyari a graan-ofrandi di e go makandra nanga a ofrandi disi, nanga a win di mus kanti leki ofrandi gi den bulu, den man skapu nanga den skapu. Un sa du disi leki fa un leri èn un sa poti someni leki fa un ben leri taki un mus du en. ₂₅Un sa tyari wan bokoboko leki ofrandi tu fu kisi pardon fu sondu. Boiti a ofrandi disi un sa tan bron a ofrandi di mus bron aladei, a graan-ofrandi di e go makandra nanga en, nanga a win di mus kanti leki ofrandi. ₂₆Tapu a di fu feifi dei un sa tyari neigi bulu, tu man skapu nanga tin-na-fo skapu fu wan yari leki ofrandi. Noti no mus mankeri den skapu disi. ₂₇Un sa tyari a graan-ofrandi di e go makandra nanga a ofrandi disi, nanga a win di mus kanti leki ofrandi gi den bulu, den man skapu nanga den skapu. Un sa du disi leki fa un leri èn un sa poti someni leki fa un ben leri taki un mus du en. ₂₈Un sa tyari wan bokoboko leki ofrandi tu fu kisi pardon fu sondu. Boiti a ofrandi disi un sa tan bron a ofrandi di mus bron aladei, a graan-ofrandi di e go makandra nanga en, nanga a win di mus kanti leki ofrandi. ₂₉Tapu a di fu siksi dei un sa tyari aiti bulu, tu man skapu nanga tin-na-fo skapu fu wan yari leki ofrandi. Noti no mus mankeri den skapu disi. ₃₀Un sa tyari a graan-ofrandi di e go makandra nanga a ofrandi disi, nanga a win di mus kanti leki ofrandi gi den bulu, den man skapu nanga den skapu. Un sa du disi leki fa un leri èn un sa poti someni leki fa un ben leri taki un mus du en. ₃₁Un sa tyari wan bokoboko leki ofrandi tu fu kisi pardon fu sondu. Boiti a ofrandi disi un sa tan bron a ofrandi di mus bron aladei, a graan-ofrandi di e go makandra nanga en, nanga a win di mus kanti leki ofrandi. ₃₂Tapu a di fu seibi dei un sa tyari seibi bulu, tu man skapu nanga tin-na-fo skapu fu wan yari leki ofrandi. Noti no mus mankeri den skapu disi. ₃₃Un sa tyari a graan-ofrandi di e go makandra nanga a ofrandi disi, nanga a win di mus kanti leki ofrandi gi den bulu, den man skapu nanga den skapu. Un sa du disi leki fa un leri èn un sa poti someni leki fa un ben leri taki un mus du en. ₃₄Un sa tyari wan bokoboko leki ofrandi tu fu kisi pardon fu sondu. Boiti a ofrandi disi un sa tan bron a ofrandi di mus bron aladei, a graan-ofrandi di e go makandra nanga en, nanga a win di mus kanti leki ofrandi. ₃₅Tapu a di fu aiti dei un sa konmakandra fu hori wan fesa. Un no sa du no wan hebi wroko. ₃₆A dei dati un sa bron wan ofrandi. Un sa bron en nanga faya leki wan switi smeri gi MASRA. Un sa bron wan bulu, wan man skapu nanga seibi skapu fu wan yari. Noti no mus mankeri den skapu. ₃₇Un sa tyari a graan-ofrandi di e go makandra nanga a ofrandi disi, nanga a win di mus kanti leki ofrandi gi den bulu, den man skapu nanga den skapu. Un sa du disi leki fa un leri èn un sa poti someni leki fa un ben leri taki un mus du en. ₃₈Un sa tyari wan bokoboko leki ofrandi tu fu kisi pardon fu sondu. Boiti a ofrandi disi un sa tan bron a ofrandi di mus bron aladei, a graan-ofrandi di e go makandra nanga en, nanga a win di mus kanti leki ofrandi.

₃₉Disi na den ofrandi di un mus bron gi MASRA tapu den fesadei fu unu, den graan-ofrandi, a win di mus kanti leki ofrandi nanga den freide-ofrandi, boiti den sani di un ben pramisi fu gi leki ofrandi nanga den sani di un wan gi leki ofrandi nanga wan fri wani.” ₄₀Dan Moses taigi den sma fu Israel ala den sani di MASRA taigi en fu du.

₁Dan Moses taigi den edeman fu den lo fu Israel taki: “Disi na san MASRA komanderi un fu du.

₂Te wan man pramisi MASRA taki a o du wan sani, noso te a teki wan plekti nen en tapu fu di a sweri en, a no sa broko a pramisi noso a sweri dati. A sa du en leki fa a ben pramisi noso sweri taki a o du en. ₃Ma te wan umasma pramisi MASRA wan sani noso efu a ben teki wan plekti na en tapu di a ben de leki wan yongu uma ete ini en p'pa oso, ₄a sa du ala den sani di a ben pramisi èn a sa du ala den plekti di a ben teki na en tapu, efu en p'pa no taki noti di a e yere taki a yongu uma disi e meki a pramisi nanga di a e teki a plekti na en tapu. ₅Ma efu en p'pa no ben wani fu a du en di a yere san a uma taki, dan a uma no sa abi fu du no wan fu den pramisi noso den plekti di a ben teki na en tapu. MASRA sa gi en pardon fu di en p'pa no ben wani fu a du en.

₆Efu a uma trow, baka di a meki den pramisi èn teki a plekti na en tapu sondro fu a ben denki moro fara, ₇a sa hori ensrefi na den pramisi nanga a plekti di a teki na en tapu, efu en masra yere fu en dan a no taki noti. ₈Ma efu en masra no wani fu a du en di a kon yere fu en, dan a uma no sa abi fu du en, fu di en masra e meki taki a pramisi di a uma ben meki nanga a ferplekti di a ben teki na en tapu sondro fu a denki moro fara, lasi den krakti. Dan MASRA sa gi en pardon.

₉Wan uma di masra dede kba noso wan uma di broko trow sa hori ensrefi na ala pramisi di a ben meki nanga ala plekti di a ben teki na en tapu.

₁₀Efu wan trow uma meki wan pramisi ini a oso fu en masra noso efu a sweri fu teki wan plekti na en tapu ₁₁dan en masra yere ma a no taigi en noti èn a no taigi a frow tu fu no du en, a uma abi fu hori ensrefi na ala pramisi di a ben meki nanga ala plekti di a ben teki na en tapu. ₁₂Ma efu en masra yere dan a kaka futu taki a no wan fu a uma du en, a uma no abi fu hori ensrefi na den pramisi di a ben taki tak' a o du nanga den plekti di a ben teki na en tapu. MASRA sa gi a uma pardon fu di en masra no ben wani fu a du en. ₁₃A masra fu a uma kan meki taki a uma hori ensrefi na ala pramisi nanga ala plekti di a sweri taki a o du, ma en masra kan meki tu taki a uma no abi fu hori ensrefi na no wan fu den sani disi. ₁₄Efu en masra no taki noti te leki a tra dei fu en, dan dati wan taki tak' a uma sa abi fu hori ensrefi na ala pramisi nanga ala plekti di a teki na en tapu. A uma sa abi fu du en fu di en masra no taigi en noti di a yere taki a uma e meki den pramisi. ₁₅Ma efu en masra yere dan a kaka futu taki a no wani fu a uma du en, dan a frantwortu sa de gi a masra.”

₁₆Disi na a fasi fa wan man mus du nanga en uma èn a fasi fa wan p'pa mus du nanga wan umapikin di e libi ini en p'pa oso ete. Na so MASRA komanderi Moses taki den mus tan du.

₂₂Na so den kon doro na Betsaida. Den sma tyari wan breniman kon na Yesus, dan den begi En fu A fasi a man fu a kan si baka. ₂₃Yesus hori a man na en anu dan A tyari en go na dorosei fu a dorpu. A spiti ini a man ai, èn A poti En anu na den tapu. Dan Yesus aksi en taki: “Yu e si wan sani?” ₂₄A man piki taki: “Mi e si libisma, ma den gersi bon di e waka.” ₂₅Dan Yesus poti En anu ete wan leisi tapu den ai fu a man, dan a ben man si krin. Den ai fu en ben kon bun baka. Bigin fu a ten dati a man bigin si ala sani krin. ₂₆Dan Yesus seni a man go na oso, ma A taigi en taki: “Yu no mus drai go baka ini a dorpu.”

₂₇Dan Yesus go nanga den man di ben e teki leri fu En na den dorpu ini a birti fu Sesarea Filipi. Di den de na pasi, A aksi den man di ben e teki leri fu En taki: “Suma den sma e taki tak' Mi de?” ₂₈Den man piki taki: “Son sma e taki: Yu na Yohanes a Dopuman. Tra sma e taki: Yu na Elia. Trawan baka e taki: Yu na wan fu den profeiti.” ₂₉Dan Yesus aksi den taki: “Ma unu, suma unu e taki tak' Mi de?” Petrus piki En taki: “Yu na a Mesias.” ₃₀Dan Yesus warskow den taki den no mus taigi no wan sma a sani disi.

₃₁Dan now Yesus bigin leri den man di ben e teki leri fu En taki a Manpikin fu Libisma o abi fu nyan furu pina. Den fesiman fu a folku, den prenspari priester, nanga den sabiman fu Gado wèt o poti En na wan sei. Sma o kiri En, ma baka dri dei A o kon baka na libi. ₃₂Na so Yesus taigi den krin san o psa nanga En. Ma Petrus kari Yesus go na wan sei, dan a taigi En taki A no mus taki sowan sani. ₃₃Yesus drai luku den tra man fu En, dan A bari Petrus taki: “Kmopo na Mi tapu, Satan! Bika yu no e prakseri den sani fu Gado, ma na libisma sani yu e prakseri.”

₃₄Dan Yesus kari a bigi grupu sma nanga den man di ben e teki leri fu En kon na En. A taigi den taki: “Efu wan sma wani waka na Mi baka, a mus poti en eigi wani na wan sei. A mus de klar'klari fu nyan pina, èn a mus kon nanga Mi. ₃₅Bika a sma di wani tan libi fa a wani, o lasi en libi. Ma a sma di e poti en libi na wan sei fu Mi ede nanga fu a bun nyunsu ede, sa kisi a libi fu têgo. ₃₆Bika san yu e wini efu yu kisi ala sani fu grontapu, ma yu lasi a libi fu têgo? ₃₇Èn san wan sma o man gi fu kisi a libi fu têgo? ₃₈Mi e taigi un taki: Den sma fu a ten disi no wani sabi not'noti fu Gado, èn den e tan du sondu. Efu wan fu den sa taki tak' a no sabi Mi, noso den sani san Mi e leri, dan te a Manpikin fu Libisma o drai kon baka nanga den santa engel èn nanga a bigi makti fu En P'pa, dan En srefi o taki tu tak' A no sabi a sma dati.”