Dag 7 van 365- Genesis 18-19 en Matteüs 6:1-18

₁Dan MASRA sori ensrefi na Abraham na den bigi bon fu Mamre pe Abraham ben e tan. Abraham ben e sidon na mofodoro fu en tenti. A ben de a moro faya yuru fu a dei. ₂Di Abraham opo en ede luku, wantronso a si dri man tnapu. Di a si den a opo, a waka es'esi go miti den dan a boigi gi den. ₃Dan a taigi wan fu den taki: “Mi Masra, efu yu abi prisiri nanga mi dan mi e begi tangitangi fu yu no psa a oso fu yu knekti. ₄Meki mi seni teki pikinso watra fu un wasi un futu, dan un rostu ondro a bon. ₅Fu di un kon na mi oso mi sa go teki pikinso nyanyan gi unu tu fu un kan kisi krakti baka. Baka dati un kan hari go moro fara.” Dan den piki Abraham taki: “A bun. Du san yu taki.”

₆So Abraham go es'esi na Sara di ben de ini a tenti, dan a taigi en taki: “Go es'esi go teki dri kan fu a moro bun blon. Masi en, dan yu e baka kuku fu en es'esi.” ₇Dan Abraham lon go na den kaw. A teki wan yonguwan di ben fatu moi. A langa en gi a knekti fu en, dan a knekti gwe es'esi go srakti a kaw fu a ben kan bori a meti fu en. ₈Di a meti ben klari fu nyan, Abraham poti en makandra nanga botro nanga merki gi den. Dan a tan tnapu nanga den ondro a bon di den ben e nyan.

₉Dan den aksi Abraham taki: “Pe yu frow Sara de?” A piki den taki: “A de drape ini a tenti.” ₁₀Ne wan fu den taki: “Fu tru, mi e taigi yu taki tra yari mi sa drai kon baka na yu, dan yu frow Sara sa abi wan boi.” Ma Sara ben tnapu na baka a man na mofodoro fu a tenti e arki. ₁₁Abraham nanga Sara ben grani srefsrefi kba. Sara no ben e kisi en munsiki moro. ₁₂Ne Sara lafu. A prakseri na ensrefi taki: “Mi skin kon owru kba. Mi masra srefi owru kba. Fa mi sa abi prisiri ete dan fu go na bedi nanga mi masra?” ₁₃Dan MASRA aksi Abraham taki: “Fu sanede Sara e lafu? Fu sanede a taki: ‘Mi sa kisi pikin ete tapu mi owru dei?’ ₁₄Yu denki taki wan sani de di MASRA no man du? Tra yari, te a ten doro, Mi sa drai kon baka na yu dan Sara sa abi wan manpikin.” ₁₅Ma Sara ben kon frede. Dat' meki a taki: “A no tru. Mi no lafu.” Ma MASRA piki taki: “A tru. Yu ben lafu.”

₁₆Dan den dri man kmoto fu drape go na wan presi pe den ben man si Sodom. Abraham ben waka go te drape nanga den di den e gwe. ₁₇MASRA ben e prakseri na ensrefi: “Mi sa kibri gi Abraham sa Mi wan du? ₁₈Bika den bakapikin fu en sa tron wan bigi èn tranga folku. Ala folku na grontapu sa winsi fu Mi blesi den leki fa Mi blesi en. ₁₉Na en Mi teki. A mus leri den pikin nanga den bakapikin fu en fu den libi leki fa Mi, MASRA, wani: Leki sma di bun ini Mi ai èn di e libi bun. Dan so Mi sa man meki den pramisi di Mi ben gi Abraham, kon tru.” ₂₀Ne MASRA taki: “Mi yere den hebi kragi fu den sani di e psa ini Sodom nanga Gomora, fa den sma fu drape e sondu hebi. ₂₁Mi wani saka go fu go luku efu den hebi kragi de trutru so. Mi wan sabi.”

₂₂So den tu man kmoto fu drape fu go na Sodom, ma MASRA ben tan tnapu nanga Abraham ete. ₂₃Abraham go pikinso moro krosbei dan a taki: “Yu sa figi sma di bun ini yu ai puru makandra nanga den sma di e du ogri? ₂₄Kande feifitenti bun sma de ini a foto. Yu sa figi a foto puru dan, sondro fu gi en pardon fu den feifitenti bun sma di de ini en? ₂₅Kwet'kweti! Yu no o du so srefsrefi! Yu no sa kiri den bun sma makandra nanga den ogriwan, neleki den bun sma nanga den ogriwan na a srefi. Nono. Yu na A Krutuman di e krutu heri grontapu. Yu e krutu nanga leti.” ₂₆Ne MASRA piki taki: “Efu Mi feni feifitenti bun sma ini Sodom, Mi sa gi a heri foto pardon fu den feifitenti sma dati ede.” ₂₇Abraham piki baka taki: “Tye, MASRA, gi mi pardon fu di mi leki wan libisma prefuru fu taki nanga yu. ₂₈Ma kande feifitenti bun sma no de. Kande feifi e mankeri. Yu sa figi a heri foto puru dan, fu di feifi e mankeri?” MASRA piki taki: “Mi no sa figi a foto puru efu Mi feni fotenti nanga feifi bun sma.” ₂₉Abraham aksi baka taki: “Kande fotenti nomo de.” MASRA piki en baka taki: “Mi no sa du en fu den fotenti sma ede.” ₃₀Dan Abraham taki: “MASRA, mi e begi no kisi atibron gi mi efu mi aksi ete wan leisi. Ma kande dritenti sma nomo de.” Ne MASRA piki taki: “Mi no sa du en efu Mi feni dritenti sma.” ₃₁Ma Abraham taki baka taki: “Tye, MASRA, gi mi pardon fu di mi e prefuru fu taki nanga yu. Kande tutenti sma de.” MASRA piki taki: “Mi no sa figi a foto puru fu den tutenti sma dati ede.” ₃₂Dan Abraham taki: “MASRA, mi e begi, no kisi atibron gi mi efu mi aksi ete wan leisi. Ma kande tin sma nomo de.” MASRA piki taki: “Mi no sa figi a foto puru fu den tin sma dati ede.”

₃₃Di MASRA kba taki nanga Abraham a gwe. Dan Abraham drai go na en tenti.

₁Neti yuru, den tu engel kon doro na Sodom. Lot ben sidon na a bigi doro pe yu e kon ini a foto. Di a si den a opo, a waka miti den, dan a boigi dipi gi den. ₂A taki: “Mi Masra, mi e begi unu, un drai kon na a oso fu un knekti. Un kan wasi un futu èn psa a neti na mi, dan tamara mamanten un kan go moro fara.” Ma den piki en taki: “Nono, wi o psa a neti tapu a pren.” ₃Ma Lot tan aksi den te leki den go nanga en na en oso. Drape a poti nyanyan gi den. A baka brede tu di ben meki sondro dyesi, dan den nyan.

₄Den no ben go didon srefi ete di ala den man fu a foto Sodom lontu a oso, yonguwan nanga owruwan. No wan no ben tan na baka. ₅Den bari gi Lot taki: “Pe den man de di o psa a neti na yu oso? Tyari den kon na dorosei meki un sribi nanga den.” ₆Lot go na dorosei, ma a hari a doro tapu na en baka. ₇Dan a taigi den taki: “Mi e begi un brada, un no du a ogri sani dati. ₈Luku, mi abi tu umapikin di noiti no sribi nanga wan man ete. Mi sa tyari den kon na dorosei. Dan un kan du nanga den san un wani. Ma un no du den man disi noti, bika den de ini mi oso èn mi no kan meki wan sani miti den.” ₉Ma den man taigi Lot taki: “Kmoto na pasi.” Den taki tu taki: “Ensrefi no de fu a foto disi, dan a wan kon taigi wi san wi mus du. Efu yu no luku bun wi o du moro ogri nanga yu leki san wi o du nanga den.” Dan den bigin waka kon na Lot tapu fu pusu en poti na wan sei, fu den ben kan broko a doro opo. ₁₀Ne den man di ben de ini a oso grabu Lot, den hari en kon na inisei, dan den sroto a doro. ₁₁Dan den breni den man di ben de na dorosei, bigiwan nanga pikinwan. So den ben e du ala muiti, ma den no ben man feni a doro moro.

₁₂Dan den man aksi Lot taki: “Yu abi tra famiri dyaso ete? Efu yu abi manpikin nanga umapikin, efu den umapikin fu yu abi masra, noso awinsi sortu tra famiri yu abi dyaso ete, teki den kmoto fu a foto disi. ₁₃Wi o figi a foto disi puru fu grontapu. Bika MASRA yere den hebi kragi fu den sani di e psa ini Sodom nanga Gomora. Den kon furu trutru. Dat' meki MASRA seni wi fu figi a foto disi puru na grontapu.” ₁₄So Lot opo go na den man di ben o trow nanga den umapikin fu en, dan a taigi den taki: “Opo, gwe libi a presi disi, bika MASRA o figi a foto disi puru.” Ma den ben denki taki na spotu Lot e meki.

₁₅Di dei opo den man taigi Lot fu a no draidrai moro. Den taigi en taki: “Opo, teki yu frow nanga den tu umapikin fu yu, di de dyaso nanga yu, dan un gwe. Efu yu tan yu o dede tu te a foto disi o kisi en strafu.” ₁₆Ma Lot ben e draidrai ete. Ne den man grabu en nanga en frow nanga den tu umapikin fu en na den anu, tyari den kmoto ini a foto, bika MASRA ben abi sari-ati nanga Lot. ₁₇Di den kmoto ini a foto, wan fu den man taigi den taki: “Un lon gi un libi. No luku na baka èn no tan tnapu no wan presi dyaso ini a dal. Un lon es'esi go na den bergi noso un o dede tu.” ₁₈Ma Lot taigi en taki: “Nono, Masra. ₁₉Luku, yu ben abi prisiri nanga yu knekti. Yu du mi wan bigi bun fu meki mi tan na libi, ma mi no o man lowe go na den bergi. A ogri o miti mi fosi mi doro drape èn mi o dede. ₂₀Luku, a pikin foto drape de krosbei nofo fu mi lon go. Na wan pikin foto nomo. Meki mi lon go drape, dan mi sa tan na libi.” ₂₁Ne a man taigi en taki: “A bun, mi sa du san yu aksi mi. Mi no sa figi a foto dati puru na grontapu. ₂₂Lowe es'esi go drape, bika mi no man du noti solanga yu no doro drape.” Dat' meki den e kari a foto dati Soar.

₂₃Dei ben e opo kba, di Lot doro na ini Soar. ₂₄Dan MASRA meki faya nanga kroiti fadon fu heimel tapu Sodom nanga Gomora. ₂₅A figi den foto disi nanga a heri kontren puru na grontapu. A kiri ala den sma fu den foto nanga ala sani di ben e gro drape. ₂₆Ma a frow fu Lot ben drai luku na baka. Dan a tron wan sowtupostu.

₂₇Abraham ben go fruku mamanten na a presi pe a ben tan tnapu nanga MASRA. ₂₈A luku go na a sei fu Sodom nanga Gomora nanga a heri kontren drape. Di a luku, a si fa smoko e opo fu gron go na loktu leki a smoko fu wan bigi onfu.

₂₉Ma Gado sori taki A no ben fergiti Abraham. A no ben meki Lot dede di A figi den foto puru na grontapu, di ben de ini a kontren fu a Yordanliba, pe Lot ben e libi.

₃₀Ma Lot ben frede fu tan na ini Soar. So a kmoto fu drape dan en nanga den tu umapikin fu en hari go na den bergi. Drape den go tan na ini wan bergi-olo. ₃₁Dan a fosi umapikin fu Lot taigi en pikin s'sa taki: “Tra mansma no de ini a kontren fu teki wi leki uma, leki fa a musu. Wi p'pa srefi no de so yongu moro. ₃₂Kon meki wi gi wi p'pa win fu dringi, dan wi kan didon nanga en, èn meki pikin gi en.” ₃₃Dan den gi den p'pa win fu dringi a neti dati. Dan a fosi umapikin go didon nanga en p'pa. Lot no ben sabi srefi oten a pikin ben kon didon nanga en, nanga oten a gwe baka. ₃₄A tra mamanten fu en a fosi umapikin fu Lot taigi en pikin s'sa taki: “Arki, esde neti mi didon nanga p'pa. Meki wi gi en win fu dringi tide neti tu. Dan yu kan go didon nanga en, èn meki pikin gi en.” ₃₅So den kon gi den p'pa win fu dringi a neti dati tu. Dan a yonguwan go didon nanga en p'pa. Lot no ben sabi srefi oten a pikin ben kon didon nanga en, nanga oten a gwe baka. ₃₆Na so ala den tu umapikin fu Lot hori bere fu den p'pa. ₃₇A fosiwan kisi wan boi di a gi a nen fu Moab. Den Moabitisma di wi sabi tide, na den bakapikin fu en. ₃₈A pikin s'sa kisi wan boi tu di a gi a nen fu Ben-Ami. Den Amonitisma di wi sabi tide, na den bakapikin fu en.

₁“Sorgu taki te yu e du tra sma wan bun, yu no e du en fu sma si. Noso yu no abi pai na yu P'pa di de na heimel. ₂Te yu e gi wan pôtisma wan sani, no du en nanga pranpran. Bika na so den hoigriman e du ini den kerki nanga tapu strati, soso fu sma kan gi den grani. Fu tru Mi e taigi un taki: Den kisi den pai kba. ₃Ma te yu e gi wan pôtisma wan sani, yu kruktu-anu no mus sabi san yu let'anu e du. ₄Na so a e tan wan kibri sani. Dan yu P'pa di si san yu du, sa pai yu.”

₅“Te yu e begi, yu no mus de leki den hoigriman. Bika den lobi fu tnapu begi ini den kerki nanga tapu uku fu strati fu sma kan si den. Fu tru Mi e taigi un taki: Den kisi den pai kba. ₆Ma te yu e begi, go na ini yu kamra èn tapu a doro. Dan yu e taki nanga yu P'pa di no wan sma e si. Ma yu P'pa di e si yu drape, sa pai yu.

₇Te yu e begi yu no mus begi langabere begi leki den sma di no sabi Gado. Bika den e prakseri taki te den begi langa, den o kisi san den e aksi. ₈Yu no mus begi leki den, bika yu P'pa sabi san yu abi fanowdu fosi yu aksi En. ₉Ma disi na a fasi fa yu mus begi:

₁₆Yesus taigi den moro fara taki: “Te yu e faste, yu no mus poti wan sari fesi leki den hoigriman. Bika den e masi den fesi soso fu sma kan si taki den e faste. Fu tru Mi e taigi un taki: Den kisi den pai kba. ₁₇Ma te yu e faste, yu mus wasi yu fesi èn yu mus kan yu wiwiri. ₁₈Sma no abi fu sabi taki yu e faste, ma soso yu P'pa di no wan sma e si. Dan yu P'pa di e si san yu e du na wan kibri fasi, sa pai yu.”