Dag 88 van 365- Rechters 7-8 en Lucas 5:1-16

₁A tra mamanten frukufruku Yerubaal, dati na Gideon, nanga ala den man di ben de nanga en opo, dan den hari go meki den kampu na a watrabron Harod. A kampu fu den Midyanitisma ben de na noordsei fu en, ini a dal di ben de na a futu fu a pikin bergi More. ₂Dan MASRA taigi Gideon taki: “Mi no o gi den Midyanitisma abra na yu, bika den man fu yu furu tumsi. Mi no wani den Israelitisma naki tapu den borsu gi Mi taki nanga den eigi krakti den wini a feti. ₃Dat' meki yu mus bari fu ala den man fu yu yere, taki a sma di e frede èn di e beifi kan saka kmopo fu a Gileadbergi dan a drai go baka na en oso.” Di Gideon du dati tutenti-na-tu dusun man drai gwe. Tin dusun man tan na baka. ₄Ma MASRA taigi Gideon taki: “Den man di libi furu ete. Meki den saka go na a watra. Drape Mi sa prati den gi yu. Den wan di Mi o taigi yu taki o go nanga yu, sa go nanga yu. Ma den wan di Mi o taigi yu taki no mus go nanga yu, no sa go nanga yu tu.” ₅Dan Gideon meki den man saka go na a watra, èn MASRA taigi en taki “Den wan di e leki a watra nanga den tongo leki fa dagu e dringi, yu mus puru mindri den wan di go na tapu den kindi fu dringi.” ₆Dri hondro man ben teki watra nanga den anu dringi. Ala den trawan ben go na tapu den kindi fu dringi. ₇Dan MASRA taigi Gideon taki: “Nanga den dri hondro man di leki a watra, Mi sa ferlusu unu. Mi sa gi Midyan abra ini yu makti. Ala den tra man kan drai go na den oso baka.” ₈Dan Gideon hori soso den dri hondro man na en. A teki a nyanyan nanga den tutu di den tra man ben abi na den, dan a seni den go baka na oso. A legrekampu fu den Midyanitisma ben de na ondrosei fu en ini a dal.

₉A neti dati MASRA taigi Gideon taki: “Opo, broko go ini a legrekampu fu yu feyanti, bika Mi gi den abra na yu. ₁₀Efu yu e frede fu broko go na den tapu, dan yu mus saka go na a kampu fu den nanga yu knekti Pura. ₁₁Drape yu o yere san den e taki. A sani dati o gi yu dek'ati fu broko go na den tapu.” Dan Gideon nanga en knekti Pura saka go te na den fosi tenti fu a legrekampu fu a feyanti. ₁₂Den Midyanitisma, den Amalekitisma nanga den folku fu oostsei, ben furu leki sprenka. Den kameel fu den no ben de fu teri. Den ben furu leki a santi na sekanti. ₁₃Di Gideon doro drape, wan man ben e ferteri wan trawan san a dren. A taigi a trawan taki: “Mi kisi wan dren. Mi si fa wan brede di meki fu groto lolo kon ini a legrekampu fu Midyan. A lolo go na wan tenti, a naki en trowe èn a tenti fadon dan a drai nanga a ondrosei pisi kon na loktu.” ₁₄Ne a trawan piki en taki: “Dati no kan de noti moro leki a deigri fu a Israelitiman Gideon, a manpikin fu Yoas. Gado gi Midyan nanga a heri legrekampu abra na en.”

₁₅Leki fa Gideon yere a dren nanga san a dren wani taki, a boigi èn a anbegi MASRA. Baka dati a drai go baka na a legrekampu fu Israel, dan a taki: “Un opo, bika MASRA gi a legrekampu fu Midyan abra ini un makti.” ₁₆Dan a prati den dri hondro man ini dri grupu èn a gi ini wan fu den wan tutu nanga wan leigi kroiki nanga wan frambo na ini. ₁₇Dan a taigi den taki: “Un mus du leki fa mi o du. Te mi o doro na mofosei fu a legrekampu fu den, un mus du a srefi sani di mi o du. ₁₈Te mi nanga den wan di de nanga mi o bro tapu a tutu, dan unsrefi mus bro tapu un tutu lontu a heri legrekampu fu den. Dan un mus bari taki: ‘Gi MASRA nanga gi Gideon!’ ” ₁₉Gideon nanga den wan hondro man di ben de nanga en, doro na mofosei fu a legrekampu fu a feyanti, di a di fu tu wakti ben o bigin. Den waktiman no ben teki den presi langa ete fu bigin koti wakti. Dan den bro tapu den tutu èn den naki den kroiki broko di den ben hori ini den anu. ₂₀Ala den dri grupu ben e bro tapu den tutu èn den naki den kroiki broko. Den ben hori den frambo ini den kruktu anu, den tutu ini den leti anu, èn den bari taki: “A deigri fu MASRA nanga Gideon!” ₂₁Den alamala ben tan tnapu tapu den presi, lontu a legrekampu. Ma a heri legre fu a feyanti ben e bari e lon gwe. ₂₂Bika di den dri hondro man bro tapu den tutu, MASRA meki taki ala den srudati ini a legrekampu fu a feyanti bigin feti nanga densrefi. Dan a legre lon gwe. Den lon go te na Bet-Hasita, na a sei fu Serera, te na mofosei fu a liba na Abel-Mekola tapusei fu Tabat.

₂₃Dan Gideon seni kari den man di ben man feti fu den lo fu Naftali, Aser nanga Manase kon baka fu hari go na baka den Midyanitisma. ₂₄A seni boskopuman go tu ini a heri bergikontren fu Efraim, nanga a boskopu taki: “Un saka fu den bergi go miti den Midyanitisma. Tapu a pasi gi den te go miti Bet-Bara, fu den no koti a Yordanliba.” Dan den man fu Efraim kon na wan èn te na Bet-Bara den ben tapu a pasi gi den Midyanitisma, fu den no koti a Yordanliba abra. ₂₅Den ben grabu Oreb nanga Seeb srefi, den tu edeman fu a legre fu den Midyanitisma. Den kiri Oreb tapu wan bergiston di den kari: Bergiston fu Oreb. Seeb den kiri ini wan baki pe droifi e masi fu meki win. Den kari a baki dati: Winbaki fu Seeb. Den tan lon baka den Midyanitisma èn den tyari den ede fu Oreb nanga Seeb gi Gideon na a tra sei fu a Yordanliba.

₄Di Gideon doro na a Yordanliba, a koti en abra nanga den dri hondro man di ben de na en. Den go na baka den feyanti, aladi den ben weri. ₅Dan a aksi den sma fu Sukot taki: “Mi e begi unu fu un gi mi wantu brede gi den srudati fu mi, bika den weri. Na baka Sebak nanga Salmuna, den kownu fu Midyan, un e lon.” ₆Ma den edeman fu Sukot piki en taki: “Yu no grabu Sebak nanga Salmuna srefi ete. Dan fu sanede un mus gi den srudati fu yu brede?” ₇Gideon piki den taki: “Te MASRA gi Sebak nanga Salmuna abra ini mi makti, Mi o kon priti un skin gi unu nanga makamaka nanga krasiwiwiri, fu a sani di un taigi mi.” ₈Fu drape a hari go na Penuel, dan a aksi den sma fu drape a srefi sani. Den piki en a srefu fasi leki den sma fu Sukot. ₉Ne a taigi den sma fu Penuel taki: “Efu noti no miti mi èn mi drai kon baka, mi o naki a toren fu un broko.”

₁₀A pisten dati Sebak nanga Salmuna ben de na Karkor nanga a legre fu den. Sowan tin-na-feifi dusun man nomo ben tan abra fu a heri bigi legre fu den folku fu oostsei. Wan hondro nanga tutenti dusun fetiman fu den, di ben sabi feti bun nanga deigri, ben lasi den libi kba. ₁₁Gideon ben teki a pasi oostsei fu Nobak nanga Yogbeha, a pasi pe den sma e tan di e libi ini tenti. Dan a broko go na tapu den Midyanitisma di ben e firi kba leki noti no ben kan miti den moro. ₁₂Sebak nanga Salmuna, den tu kownu fu den Midyanitisma suku fu lowe, ma Gideon teki na den baka, a grabu den èn a meki a legre fu den panya go na alasei.

₁₃Di Gideon, a manpikin fu Yoas, drai kmoto fu a feti, a teki a Herespasi. ₁₄Ondropasi a grabu wan yonkuman fu Sukot. Dan a aksi en fu skrifi den nen fu den edeman nanga den man di ben e tiri a foto. Makandra a ben de seibitenti-na-seibi man. ₁₅Dan Gideon go na den sma fu Sukot èn a taigi den taki: “Un luku Sebak nanga Salmuna dyaso. Un ben meki spotu nanga mi èn taigi mi taki: ‘Yu no grabu Sebak nanga Salmuna srefi ete. Dan fu sanede un mus gi den srudati fu yu di weri brede fu nyan?’ ” ₁₆Ne Gideon teki den tiriman go sroto, a seni teki makamaka nanga krasiwiwiri ini a dreisabana, dan a priti den skin taki den ben o memre en langa ten ete. ₁₇A broko a toren fu Penuel tu èn a kiri den mansma fu a foto dati.

₁₈Dan Gideon aksi Sebak nanga Salmuna taki: “Fa den man ben tan di un kiri tapu Taborbergi?” Den piki en taki: “Den ben gersi yu. Ini wan fu den ben gersi wan manpikin fu wan kownu.” ₁₉Ne Gideon taigi den taki: “Den ben de brada fu mi, manpikin fu mi eigi m'ma. Mi e sweri gi unu na a libilibi MASRA, taki efu unu no ben kiri den, mi no ben o kiri unu.” ₂₀Ne a taigi Yeter, a fosi manpikin fu en, taki: “Opo, dan yu kiri den.” Ma a boi no hari en deigri, bika a ben frede, fu di a ben yongu ete. ₂₁Dan Sebak nanga Salmuna taigi Gideon taki: “Yusrefi opo dan yu dyuku un kiri, efu yu firi yusrefi man-nengre nofo.” Dan Gideon opo èn a kiri den. Den gowtu munkenki di ben anga na den neki fu den kameel fu den, a teki tyari gwe.

₂₂Dan den man fu Israel taigi Gideon taki: “Tron wi tiriman, yu, den manpikin nanga den bakapikin fu yu. Bika na yu ferlusu unu fu Midyan.” ₂₃Ma Gideon piki den taki: “Mi no sa tron un tiriman èn mi manpikin no sa tron un tiriman tu. MASRA na un tiriman.” ₂₄Gideon taigi den moro fara taki: “Ma wan sani de di mi wan aksi unu: fu ini wan fu unu gi mi wan linga fu a gudu di un feni na den Midyanitisma.” A ben de so taki den Midyanitisma ben de bakapikin fu Ismael èn a ben de wan gwenti fu den fu weri den gudu fu den na den skin. ₂₅Den piki Gideon taki: “Nanga wi heri ati wi e gi yu.” Ne den bradi wan langa dyakti, èn ini wan fu den fringi wan linga fu a gudu di a feni na en tapu. ₂₆Den gowtu linga di den gi Gideon, fu di a ben aksi fu den, ben e wegi makandra sowan tutenti kilo. Boiti dati, den ben gi en gowtu munkenki, yesilinga, purper krosi di den kownu fu Midyan ben weri nanga den keti di den kameel ben weri na den neki. ₂₇Gideon seni meki wan efod fu ala den sani dati. A meki den poti en ini Ofra, a foto pe a ben e libi. Drape heri Israel ben e du afkodrei fu anbegi a sani disi. A sani dati broko a neki fu Gideon nanga en famiri.

₂₈Dati ben de fa Israel broko den Midyanitisma, èn den no opo noiti moro. Di Gideon ben de na libi, a ben tiri fotenti yari langa ini a kondre. ₂₉Yerubaal, a manpikin fu Yoas, go libi baka ini en oso. ₃₀A ben de p'pa fu seibitenti manpikin, bika a ben abi furu uma. ₃₁Wan fu den uma fu en, di ben e libi na Sikem, kisi wan boi gi en tu di a kari Abimelek ₃₂Gideon, a manpikin fu Yoas, dede di a ben kon owru srefsrefi. Den beri en ini a grebi fu en p'pa Yoas ini Ofra, a foto fu den bakapikin fu Abiyeser.

₃₃Baka di Gideon dede, den Israelitisma bigin waka agen baka den Baal èn den teki Baal-Berit leki den gado. ₃₄Den fergiti MASRA, a Gado fu den, di ben ferlusu den fu ala den feyanti di ben e libi lontu den. ₃₅Den no tan gi a famiri fu Yerubaal-Gideon grani fu ala a bun di a du gi Israel.

₁Wan dei Yesus ben tnapu na a syoro fu a Meer fu Genesaret. Wan bigi grupu sma ben kon na En fu yere a wortu fu Gado. Ma den ben pusu fu kon tnapu te na fes'sei. ₂Dan Yesus si tu boto na syoro. Den fis'man ben kmopo ini den boto, èn den ben e wasi den fis'neti fu den. ₃Dan A go ini a boto san ben de fu Simon. A aksi Simon fu go pikinso na mindri, no tumsi fara fu a syoro. Yesus saka sidon, dan A bigin gi den sma leri kmopo fu a boto ₄Di Yesus kba taki, A taigi Simon taki: “Go moro na mindrisei èn fringi den fis'neti fu yu go ini a watra.” ₅Ma Simon piki En taki: “Meister, heri neti un wroko tranga, ma un no kisi noti. Ma fu di na Yu taki, dan mi sa fringi den go ini a watra.” ₆Dan den fringi den fis'neti go na watra. Di den ben mus hari den kon baka, den neti ben span nanga fisi tak' den ben suku fu priti. ₇Dan den kari den fis'mati fu den di ben de ini a tra boto fu kon yepi den. Di den man kon, den lai ala den tu boto nanga fisi taki den boto ben suku fu sungu. ₈Di Simon Petrus si san psa, a fadon na tapu en kindi na Yesus fesi, dan a taki: “Masra, kmopo pe mi de, bika mi na wan sondusma.” ₉Bika en nanga den trawan di ben de nanga en, ben ferwondru fu den someni fisi san den fanga. ₁₀Yakobus nanga Yohanes, den tu fis'mati fu Simon, ben ferwondru tu. A p'pa fu den tu man disi ben nen Sebedeus. Dan Yesus taigi Petrus taki: “No frede. Bigin fu now yu o fanga libisma.” ₁₁Ne den hari den boto poti na syoro, den libi ala sani drape, dan den bigin fu waka na Yesus baka.

₁₂Di Yesus ben de ini wan fu den foto, wan man ben drape di ben abi gwasi na en heri skin. Di a man si Yesus, a trowe ensrefi langalanga na gron, dan a begi En taki: “Masra, efu Yu wani, Yu kan meki mi skin kon bun baka.” ₁₃Yesus langa En anu fasi a man, dan A taki: “Iya, Mi wani. Kon betre!” A srefi momenti dati a man kon betre. ₁₄Dan Yesus warskow a man taki: “Yu no mus taigi no wan sma. Ma yu mus go na a priester, meki a si taki yu kon betre. Dan fu sori ala sma taki yu kon betre, yu mus tyari a ofrandi gi Gado leki fa Moses skrifi taki yu mus du te yu kon betre fu gwasi.” ₁₅Ma a nyunsu fu Yesus ben e panya moro nanga moro, èn bun furu sma kon fu arki san A e taki èn fu A dresi den siki fu den. ₁₆Ma Yesus ben lobi fu go na den presi pe En wawan ben kan de, fu go begi drape.