11Huram meki den patu, den bigi spun, nanga den beki tu fu fanga brudu. Na den sani disi kownu Salomo ben taigi Huram fu a meki gi a oso fu Gado: 12den tu bigi postu, den tu postu-ede, den tu rij breiketi na den postu-ede na tapusei fu den postu, 13den fo hondro granaki-apra di den ben poti na den tu rij brei keti lontu den postu-ede, 14den kopro baki, den beki di ben o sidon ini den baki, 15a wan bigi kopro beki nanga den twarfu kaw tapu san a beki ben o sidon, 16den patu, den bigi spun nanga den forku. Den sani disi, nanga ala den tra wrokosani di Huram-Abi meki gi kownu Salomo, gi a oso fu MASRA, a meki nanga brenki kopro. 17Ini a kontren fu Yordanliba, mindri Sukot nanga Seredata, kownu ben meki den kanti a kopro poti ini den prenki di den ben diki ini a tranga kleidoti drape. 18A kopro di Salomo gi fu meki den sani dati ben furu sote tak' den no wegi en fu luku o furu a ben de. 19Salomo meki ala den sani fu a oso fu Gado tu: a gowtu altari, den tafra fu poti a brede di ben de spesrutu gi Gado, 20den kandelaar nanga den lampu fu lala gowtu. Den lampu ben mus leti fesi a baka kamra soleki fa Gado ben komanderi. 21Moro fara den gowtu bromki, den gowtu lampu nanga den gowtu tanga. Nanga bun fini gowtu den sani dati ben meki. 22Moro fara, den nefi, den beki fu fanga brudu, den skotriki nanga embre gi a krofaya, alamala fu lala gowtu. Den doro, den doro na inisei fu go na a moro santa presi nanga den wan fu a bigi kamra fu a tempel ben meki fu gowtu tu.
2 Historia 5
1Di Salomo kba du ala a wroko na a oso fu MASRA, a tyari ala den sani di en p'pa David ben poti aparti gi Gado, go poti na ini. A solfru, a gowtu nanga ala den tra sani a tyari go poti ini den kamra fu a oso fu Gado pe den gudu ben e tan.
