1Salomo meki wan kopro altari di ben langa tin meter, a ben bradi tin meter èn a ben hei feifi meter. 2A meki wan bigi kopro beki. A beki ben bradi feifi meter fu a wan lantyi go na a trawan, a ben dipi tu nanga afu meter èn a ben lontu tin-na-feifi meter. 3Na ondrosei na a lantyi fu a beki tu rij kaw ben de leki wan banti fu feifi meter lontu a beki. Den ben de wan nanga a beki. 4A beki ben sidon tapu twarfu kaw: dri fu den ben e luku go na noordsei, dri fu den ben e luku go na zuidsei, dri fu den ben e luku go na oostsei èn dri fu den ben e luku go na westsei. A beki ben e sidon tapu den mindribaka èn den tere fu ala den kaw ben e sori go na inisei ondro a beki. 5A beki ben deki leki fa wan libisma anu bradi. A lantyi ben meki leki a lantyi fu wan kan, leki wan leilibromki. A beki ben man teki wan hondro nanga tutenti dusun liter watra. 6A meki tin pikin beki tu. Feifi fu den ben tnapu na let'sei nanga feifi na a kruktusei fu a tempel. Den beki dati ben de fu spuru ala sani di ben de fanowdu te meti ben o bron leki ofrandi. A watra fu a bigi beki ben de gi den priester fu wasi.
7A meki tin gowtu kandelaar leki fa a ben skrifi taki den mus meki, dan a poti den ini a bigi kamra. Feifi ben na a let'sei èn feifi na a kruktusei fu a kamra. 8A meki tin tafra gi a bigi kamra tu dan a poti feifi na a let'sei nanga feifi na a kruktusei. A meki wan hondro beki fu fanga brudu.
9A meki wan pren gi den priester nanga a bigi pren nanga den poort. Dan a meki den poti kopro na den doro fu den poort. 10A bigi kopro beki a poti na a let'sei fu a oso, go na a zuidoostsei.
