1 juli - Galaten 4:1-11

₁Un mus si a sani so. Solanga a sma pikin ete di o kisi ala den gudu fu en p'pa, a no betre moro wan srafu, awinsi na en o abi ala sani. ₂Solanga a ten no doro san a p'pa ben poti, dan na sma e sorgu gi en, èn na sma e luku den gudu fu en. ₃Na so a ben de nanga wi tu. Wi ben de leki pikin, èn wi ben mus fu libi soleki fa den gronprakseri fu grontapu de. ₄Ma di a ten kon lepi, Gado seni En Manpikin kon. Wan uma meki en, èn A ben mus libi leki fa a wèt e taki. ₅So A ben kan bai den sma fri di ben mus fu du san a wèt e taki. A du dati fu Gado ben kan teki wi leki En eigi pikin. ₆Dan fu sori taki unu na En pikin, meki Gado seni a Yeye fu En Manpikin kon tan na ini wi ati. Èn a Yeye e kari: “Abba, Papa!” ₇So unu no de srafu moro, ma unu na pikin. Èn fu di unu na pikin, Gado sa gi unu san A abi gi En pikin.

₈A pisten di un no ben sabi Gado, un ben de srafu fu den gado di no de gado srefsrefi. ₉Ma now un kon leri sabi Gado. Nono, a moro bun fu mi taki tak' Gado kon sabi unu. Dan fa un kan drai go baka na den swaki pôti gronprakseri fu grontapu, fu tron srafu fu den baka? ₁₀Un e hori unsrefi na spesrutu dei nanga mun, sosrefi spesrutu ten nanga yari. ₁₁We, mi frede gi unu taki na fu soso mi ben meki someni muiti nanga unu.