30 juni - Lucas 8:40-56

₄₀Di Yesus drai go baka na abrasei fu a meer, wan heri ipi sma ben tnapu e wakti En. ₄₁Ne wan man Yairus kon na Yesus. Yairus ben de wan edeman fu a kerki. A fadon tapu en kindi na Yesus futu, dan a begi En tangitangi fu kon na en oso, ₄₂bika en wan enkri umapikin ben de fu dede. A pikin ben abi twarfu yari. Di Yesus ben de na pasi, wan heri ipi sma ben waka nanga En, e kwinsi En fu ala sei. ₄₃Na mindri den sma wan uma ben de, di ben abi wan siki san ben meki taki a e lasi brudu twarfu yari kba. No wan sma no ben man dresi en. ₄₄A uma waka mindri den sma kon baka Yesus, dan a fasi a ondrosei pisi fu En krosi. Wantron a kon betre. ₄₅Dan Yesus aksi taki: “Suma na a sma di fasi Mi?” Ala den sma piki tak' a no den. Dan Petrus taki: “Ma Meister, someni sma e pusu e kwinsi Yu fu ala sei.” ₄₆Ma Yesus piki taki: “Wan sma fasi Mi. Bika Mi firi taki krakti kmopo fu Mi.” ₄₇Dan a uma kon ferstan taki Yesus firi taki a fasi En. Nanga beifi ati a kon na fes'sei, dan a fadon tapu en kindi fesi Yesus. Let' fesi ala sma a ferteri En fu sanede a ben fasi En, èn taki wantewante a kon betre. ₄₈Dan Yesus taigi en taki: “Mi pikin, a bribi fu yu meki yu kon betre. Yu kan go ini freide.”

₄₉Yesus ben e taki ete nanga a uma, di wan sma fu Yairus kon na en nanga a boskopu taki: “A umapikin fu yu dede. Yu no mus ferferi a Meister moro.” ₅₀Ma di Yesus yere san a taki, A taigi Yairus taki: “No lasi ati. Bribi nomo, dan a sa kon betre.” ₅₁Di Yesus doro na Yairus oso, A no meki no wan sma kon na inisei nanga En, boiti Petrus, Yohanes, Yakobus, nanga a m'ma nanga a p'pa fu a pikin. ₅₂Ala sma ben e bari e krei fu di a pikin dede. Ma Yesus taki: “Un no krei. A pikin no dede. Na sribi a e sribi.” ₅₃Ma den sma bigin lafu En, bika den ben sabi taki a pikin dede. ₅₄Dan Yesus hori a pikin na en anu. A taki nanga tranga sten taki: “Pikin, opo!” ₅₅A pikin kisi libi baka, èn a opo wantron. Dan Yesus taigi den fu gi en wan sani fu nyan. ₅₆A m'ma nanga a p'pa fu a pikin no ben sabi san fu prakseri. Ma Yesus taigi den krin tak' den no mus taigi no wan sma san psa.