19Dat' meki yu mus skrifi a singi disi dan yu e leri den sma fu Israel a singi. Den mus sabi en ini den ede. Bika Mi o teki a singi disi leki wan ketoigi fu taigi den sma fu Israel san den du. 20Leki fa Mi sweri gi den afo fu den, Mi o tyari den go na a kondre pe a gron bun èn pe ala sani e gro. Den sa nyan den bere furu èn den o kon fatu. Dan den sa drai go dini tra gado. Den o si mi fu noti èn den o broko a ferbontu fu Mi. 21Te den bigi nowtu nanga den benawtu miti den, dan a singi disi o de leki wan ketoigi fu taigi den san den du. Bika den bakapikin fu den sa tan singi en. Mi sabi tide kba san de ini den ati. Mi sabi en fosi Mi tyari den go na a kondre di Mi sweri taki Mi o gi en na den.”
22Ne Moses skrifi a singi disi dan a leri en na den sma fu Israel. 23A taigi Yosua taki: “Teki dek'ati. Yu mus de wan dyadya man. Bika yu sa tyari den sma fu Israel go ini a kondre di Mi sweri taki Mi o gi en na den. Mi o de nanga yu.”
24Di Moses ben kba fu skrifi ala den pisi fu a heri wèt, 25a taigi den Lefitiman di ben e tyari a kisi fu a ferbontu fu MASRA taki: 26“Un teki a buku disi nanga a wèt. Un poti en sei a kisi fu a ferbontu fu MASRA, un Gado. A sa de drape leki wan ketoigi fu taigi den sma san den du. 27Bika Mi sabi fa un e kaka un futu èn fa un yesi tranga. Efu un ben kaka un futu gi MASRA now di mi de na libi ete, dan un o du en moro ete baka te mi dede. 28Kari ala den edeman fu den lo nanga den skrifiman, dan mi sa taki meki den yere èn mi sa teki heimel nanga grontapu leki ketoigi fu san mi o taki. 29Bika mi sabi taki baka te mi dede un o du sani di no bun srefsrefi. Un o kmoto fu a pasi di mi sori unu. Fu dat'ede un o kon ini bigi nowtu te un du sani di no bun ini MASRA ai èn te un wiki a atibron fu En nanga den gado di unsrefi meki.”
