9Baka di Moses skrifi a wèt, a langa en gi den priester, den manpikin fu Lefi, di ben e tyari a kisi fu a ferbontu fu MASRA, nanga gi den fesiman fu Israel. 10Moses taigi den taki: “Baka ibri seibi yari, ini a yari pe un mus taigi den sma taki den no abi fu pai un baka, te a fesa doro fu memre taki un ben e libi wan pisten ini kampu, 11èn heri Israel e hari go na a presi di MASRA, un Gado, sa sori unu fu un kon na En fesi, un mus leisi a wèt disi meki heri Israel yere. 12Un mus kari ala sma kon na wan. Mansma, umasma, pikin, nanga den doroseisma di e tan ini den foto fu unu, fu den arki. Dan den sa leri lespeki MASRA, un Gado èn hori densrefi trutru na ala den pisi fu a wèt disi. 13Dan den pikin fu den di no sabi noti fu den sani disi, sa yere fu den, èn den sa leri fu lespeki MASRA, un Gado. Un mus du disi so langa un e libi ini a kondre di un o teki abra baka te un koti a Yordanliba abra.”
14Dan MASRA taigi Moses taki: “Luku a ten e doro fu yu dede. Kari Yosua kon dan yu e go nanga en ini a tenti pe yu kan miti nanga Gado, fu Mi poti en leki a sma di o teki abra fu yu.” So Moses nanga Yosua go tnapu ini a tenti pe yu kan miti nanga Gado. 15Dan MASRA sori Ensrefi leki wan wolku di ben gersi wan bigi postu. A wolku ben tan tnapu na mofodoro fu a tenti. 16Dan MASRA taigi Moses taki: “Arki, te yu o go dede go na den afo fu yu, a folku disi no o de fu fertrow moro. Den o waka baka den gado di den no sabi fu a kondre pe un o go. Den o drai den baka gi Mi èn den o broko a ferbontu fu Mi, di Mi ben meki nanga den. 17Ma te dati psa Mi ati sa bron na den tapu. Mi sa drai Mi baka gi den èn Mi no o luku den srefsrefi moro meki den dede èn ala sortu bigi nowtu nanga benawtu miti den. Dan den o taki: ‘Den bigi nowtu disi miti wi fu di Gado no de na un mindri.’ 18Ma a pisten dati Mi no o luku den srefsrefi na wan ai fu ala den hogri di den du. Sobun, fu di den drai go dini tra gado.
