11Aaron sa tyari a bulu fu en leki wan ofrandi fu kisi pardon fu en eigi sondu, fu meki taki en nanga den sma fu en oso kon bun baka nanga Gado. Ensrefi sa srakti a bulu fu kisi pardon fu en sondu. 12Fu a altari di tnapu na MASRA fesi, a sa teki krofaya di e bron ete poti ini wan pan. A sa furu den anu fu en tu nanga a wierook di e smeri switi, dan a sa go nanga ala den sani disi ini a moro santa presi baka a garden. 13Aaron sa poti a wierook tapu a faya, na MASRA fesi, fu a smoko fu a wierook kan tapu a tapun fu a santa kisi pe den wortu de di ben e memre den na san Gado taki. Efu a no du dati a o dede. 14A sa teki pikinso fu a brudu fu a bulu nanga en finga, dan a dropudropu en na fes'sei fu a tapun, èn na gron fesi a tapun a sa dropudropu seibi leisi pikinso fu a brudu nanga en finga tu. 15Baka dati a sa srakti a bokoboko, fu a folku kisi pardon fu en sondu. Te a du dati a sa tyari a brudu go na inisei baka a garden. A sa du a srefi sani nanga a brudu disi, leki fa a ben du nanga a brudu fu a bulu. A sa dropudropu en na fes'sei fu a tapun nanga na gron fesi a tapun. 16Tapu a fasi disi Aaron e krin a moro santa presi fu a kan bun gi Gado, nanga fu den ogridu, den takrudu nanga den sondu fu den Israelitisma. Na so a sa du tu nanga a tenti pe yu kan miti nanga Gado, di tnapu na mindri fu a folku nanga ala den sondufasi fu den. 17No wan sma mus de ini a tenti pe yu kan miti nanga Gado, te Aaron go na inisei fu go meki en bun nanga Gado. Den no sa du dati te leki a kon baka na dorosei. Baka te a meki en bun nanga Gado gi ensrefi, gi en oso nanga gi a heri folku fu Israel, 18a sa go na dorosei na a altari di tnapu na MASRA fesi. A sa krin en fu a kan bun gi Gado. A sa teki pikinso fu a brudu fu a bulu nanga fu a bokoboko, dan a lobi en lontu na den tutu fu a altari. 19Te a du dati, a sa dropudropu pikinso fu a brudu seibi leisi tapu a altari. Na so a e krin en fu den sondu fu den Israelitisma nanga den sani di e meki taki den no krin ini Gado ai, èn a e meki a altari kon santa baka.
20Baka te a krin a moro santa presi, a tenti pe yu kan miti nanga Gado, nanga a altari, fu den kan bun gi Gado, a sa tyari a bokoboko kon di den no ben kiri. 21Aaron sa poti ala tu anu fu en tapu a ede fu a bokoboko, dan a sa taki ala den takrudu, den ogridu nanga den sondu di den sma fu Israel du. Na so a e poti den tapu a bokoboko. Dan wan sma di ben tnapu klari kba sa tyari a bokoboko go na a sabana. 22Drape a sa lusu a bokoboko fu a go ini a sabana. Na so a bokoboko e teki ala a sondu fu a folku na en tapu tyari go na wan presi ini a sabana pe libisma no e go.
