22Drape a sa lusu a bokoboko fu a go ini a sabana. Na so a bokoboko e teki ala a sondu fu a folku na en tapu tyari go na wan presi ini a sabana pe libisma no e go. 23Baka dati Aaron sa go na a tenti pe yu kan miti nanga Gado. A sa puru den linnen krosi di a ben weri, di a ben go ini a moro santa presi, dan a sa libi den drape. 24A sa wasi en skin tapu wan santa presi, dan a weri en tra krosi baka. Te a du dati, a sa go na dorosei, dan a bron a ofrandi di a ben mus bron gi ensrefi nanga di fu a folku, fu meki en bun nanga Gado gi en nanga gi a folku. 25A fatu fu a ofrandi fu kisi pardon fu sondu, a sa bron tapu a altari. 26A sma di ben tyari a bokoboko go gi Asasel, sa wasi en krosi nanga en skin. Baka dati a sa kon baka ini a kampu. 27Den sa teki a skin fu a bulu nanga a bokoboko di ben srakti fu kisi pardon fu sondu, tyari go na dorosei fu a kampu, dan den bron a buba, a meti nanga a inibere fu den. A brudu fu a meti disi den ben tyari go ini a santa presi fu kisi pardon fu sondu. 28A sma di bron den sa wasi en krosi nanga en skin. Baka dati a sa kon ini a kampu baka.
29Den sani disi un sa tan du fu têgo: Tapu a di fu tin dei, fu a di fu seibi mun, un mus faste èn un no mus du no wan wroko. Disi na gi den sma fu Israel, ma a de tu gi den doroseisma di e libi na un mindri. 30Bika tapu a dei dati a priester sa meki un kon bun baka nanga Mi, fu un kan kon krin baka. Un sa kon krin baka fu ala sondu na MASRA fesi. 31A sa de wan trutru sabatdei gi unu. Un sa faste èn a sa de wan sani di un sa tan du fu têgo. 32A priester di den salfu èn di den wei fu du a wroko te en papa no de moro, sa meki un kon bun baka nanga Gado. Na en sa weri den santa linnen krosi. 33A sa krin a moro santa presi, a tenti pe yu kan miti nanga Gado nanga a altari èn a sa meki den tra priester nanga a heri folku kon bun baka nanga Gado. 34Disi na wan sani di un mus tan du fu têgo, fu meki den sma fu Israel kon bun baka nanga Gado fu den sondu di den du. Un sa du en wan leisi wan yari.”
Dan Moses du ala sani leki fa MASRA ben taigi en fu du.
