9Un sa teri seibi wiki. Un mus bigin teri fu a fosi di un bigin koti graan. 10Dan un sa hori a fesa fu den wiki fu gi MASRA, un Gado, grani. Un sa tyari wan ofrandi nanga wan fri wani gi MASRA, un Gado. A ofrandi disi sa bigi na a fasi fa A ben blesi unu. 11Un sa meki prisiri na fesi fu MASRA, un Gado. Unu, den manpikin nanga den umapikin fu unu, den mansrafu nanga den umasrafu fu unu, den sma fu a lo fu Lefi di e libi ini a foto fu unu, den doroseisma, den pikin di no abi p'pa nanga m'ma moro nanga den uma di masra dede kba. Un sa prisiri na a presi di MASRA, un Gado, sa sori unu taki na drape A wani taki un mus memre En nen. 12Un mus memre taki un ben de srafu na ini Egipte. Dat' meki un mus tan du a sani disi.
13Seibi dei langa un sa hori a fesa fu memre taki un ben e libi wan pisten ini kampu. Disi un sa du te un tyari a nyanyan kon na wan di un koti ini un gron èn un masi den droifi. 14Un sa prisiri tapu a fesadei. Unu, un manpikin, un umapikin, den mansrafu nanga den umasrafu fu unu, den sma fu a lo fu Lefi, den doroseisma, den pikin di no abi p'pa nanga m'ma moro nanga den uma di masra dede kba di e libi ini a foto fu unu. 15Seibi dei langa un sa hori a fesa disi fu gi MASRA, un Gado, grani na a presi di MASRA sa sori unu. Bika MASRA, un Gado sa blesi a nyanyan fu un gron fu un kan koti furu. A sa blesi ala sani tu di un e du. Dat' meki un kan prisiri trutru.
16Dri leisi wan yari ala mansma na un mindri sa kon na fesi MASRA, un Gado, na a presi di A sa sori unu. Dati na tapu a fesa pe un mus nyan brede di meki sondro dyesi, tapu a fesa fu den wiki nanga tapu a fesa fu memre taki un ben e libi wan pisten ini kampu. Ma den no sa kon nanga leigi anu na MASRA fesi. 17Ala sma sa gi san a abi, na a fasi fa MASRA, un Gado, blesi en.
