1No fergiti taki ini a mun Abib un mus hori a Paskafesa fu gi MASRA, un Gado, grani. Bika na ini mun Abib MASRA, un Gado, puru neti na ini Egipte. 2Leki paska-ofrandi un sa srakti skapu, krabita nanga kaw gi MASRA, un Gado. Un sa srakti den na a presi pe MASRA sa sori unu taki na drape A wani taki un mus memre En nen. 3Un no sa nyan brede di meki nanga dyesi makandra nanga a meti fu a ofrandi. Seibi dei langa un no sa nyan brede di meki nanga dyesi. A brede disi mus memre unu na a pina di un pina. Bika es'esi un ben kmoto ini Egipte. Solanga un e libi un no mus fergiti a dei di un kmoto na ini Egipte. 4Seibi dei langa dyesi no sa de fu feni ini a heri birti pe un e tan. Fu a meti di un srakti a neti fu a fosi dei, noti no mus tan te leki a tamara fu en. 5Un no sa srakti a Paska-ofrandi na ini wan fu den foto di MASRA, un Gado, o gi unu. 6Ma un sa srakti en na a presi di MASRA, un Gado, sa sori unu taki na drape A wani taki un mus memre En nen. Drape un sa srakti en. Un sa srakti en te neti e fadon, te a son e go na ondro. Dati na a yuru di un ben kmoto na ini Egipte. 7Un sa bori en, èn un sa nyan en na a presi di MASRA, un Gado, sa sori unu. A tamara fu en un sa drai go baka na un tenti. 8Siksi dei langa un sa nyan brede di meki sondro dyesi. Tapu a di fu seibi dei un sa kon makandra èn hori wan fesa fu gi MASRA, un Gado, grani. Dan un no sa wroko.
