12 mei - Johannes 5:14-29

₁₄Baka dati Yesus miti a man ini a tempel, dan A taigi en taki: “Arki, yu kon betre. Ma yu mus tapu nanga a sondu libi, noso wan moro takru sani o psa nanga yu.” ₁₅Dan a man gwe go ferteri den fesiman fu den Dyusma taki na Yesus ben dresi en. ₁₆Fu dat'ede den fesiman fu den Dyusma bigin fu de nomo na Yesus baka fu du En ogri, bika A ben du a sani disi tapu wan sabatdei. ₁₇Ma Yesus taigi den taki: “Mi P'pa e wroko te nanga a dei fu tide. Dat' meki Mi e wroko tu.” ₁₈So den Dyu fesiman ben e du moro furu muiti fu kiri Yesus. Bika A no ben broko a wèt fu sabatdei wawan, ma A ben kari Gado En eigi P'pa tu. Tapu sowan fasi A ben taki tak' En nanga Gado na wan.

₁₉Dan Yesus taigi den taki: “Fu tru Mi e taigi un taki: A Manpikin no man du noti fu Ensrefi, ma A e du soso san A si taki a P'pa e du. San a P'pa e du, na dati a Manpikin e du tu. ₂₀Bika a P'pa lobi a Manpikin, èn A e sori En ala sani san Ensrefi e du. A o sori En moro bigi wroko leki disi di o meki unu ferwondru. ₂₁Bika soleki fa a P'pa e meki dedesma opo baka èn A e gi den libi, na so a Manpikin e gi libi tu na suma A wani. ₂₂Moro fara a P'pa no e krutu no wan sma, ma A o meki a Manpikin krutu ala sani. ₂₃A du dati fu ala sma gi a Manpikin grani, soleki fa den e gi a P'pa grani. A sma di no e gi a Manpikin grani, no e gi grani na a P'pa tu di seni En kon.

₂₄Fu tru Mi e taigi un taki: A sma di arki san Mi e taki, èn di bribi ini a Wan di seni Mi kon, abi a libi fu têgo. A no sa kon ondro a krutu, ma a kmoto fu dede kon na libi. ₂₅Fu tru Mi e taigi un taki: A ten e kon èn a de kba, pe den dedewan o yere a sten fu a Manpikin fu Gado, èn den wan di yere en o libi. ₂₆Bika soleki fa a P'pa abi libi ini Ensrefi, na so A meki taki a Manpikin abi libi ini Ensrefi tu. ₂₇A gi En makti tu fu krutu sma, bika En na a Manpikin fu Libisma. ₂₈Un no mus ferwondru fu a sani disi. Bika a ten e kon tak' ala den dedesma o yere En sten, ₂₉dan den o opo kmoto fu den grebi. Den sma di ben du bun, o opo baka fu kisi a libi fu têgo. Ma den sma di ben du ogri, o opo baka fu kisi strafu.