1Te un doro ini a kondre di MASRA, un Gado, o gi unu taki na fu unu, te un teki en abra èn un e libi drape, 2un sa teki pikinso fu den fosi nyanyan fu a gron di un o koti, ini a kondre di MASRA, un Gado, o gi unu. Un sa poti den ini wan mantyi dan un tyari en go na a presi di MASRA, un Gado, o sori unu taki na drape un mus memre En nen. 3Te un doro na a priester di drape un sa taigi en taki: “Tide mi e taki na fesi MASRA, un Gado, taki mi doro ini a kondre, di MASRA ben sweri gi den afo fu unu, taki A bo gi en na unu.” 4A priester sa teki a mantyi na un anu, dan a sa poti en fesi a altari fu MASRA, un Gado. 5Baka dati un sa taki na MASRA, un Gado, fesi taki: “Mi afo ben den wan man fu Aram di no ben abi wan fasti tan presi. A hari go nanga wan pikin grupu go na Egipte, dan a tan drape leki wan doroseisma. Ma drape a tron wan bigi tranga folku. 6Di den sma fu Egipte ben e fon unu, pina unu èn dwengi unu fu du tranga wroko leki srafu, 7wi kari MASRA, a Gado fu den afo fu unu, fu yepi wi èn MASRA yere wi sten. A si a nowtu ini san un ben de nanga a pina di wi ben e pina. 8Ne MASRA puru un na ini Egipte nanga bigi krakti nanga makti èn A du wondru nanga marki di tyari bruya. 9A tyari un kon dyaso, dan A gi unu a kondre disi. Wan kondre pe merki nanga oni de bogobogo. 10Luku, tide mi e tyari den fosi nyanyan kon di mi koti fu a gron di Yu, MASRA, gi mi.” Dan un sa poti den na fesi fu MASRA, un Gado. Un sa boigi fesi MASRA, un Gado, 11dan un, den sma fu a lo fu Lefi di e tan na unu, nanga den doroseisma di e tan na un mindri, sa prisiri fu ala den bun di MASRA, un Gado, du gi yu nanga den ososma fu yu.
