12A di fu dri yari sa de a yari fu tin prosenti. Ini a yari dati un mus tyari tin prosenti fu ala a nyanyan fu un gron kon na wan. Dan un sa gi en na den Lefitiman, den doroseisma, den pikin di no abi p'pa nanga m'ma moro nanga den uma di masra dede kba, fu den abi nofo fu nyan. 13Dan un sa taki na MASRA, un Gado, fesi taki: “Mi hori mi na a gebod di Yu gi mi. Mi puru a tin prosenti fu mi oso èn mi gi en na den Lefitiman, den doroseisma, den pikin di no abi p'pa nanga m'ma moro nanga na den uma di masra dede kba. Mi hori mi na ala den gebod fu Yu èn no wan fu den mi no fergiti. 14Mi no nyan noti fu a tin prosenti di mi ben de na row, mi no tyari en kon di mi no ben krin èn mi no gi noti fu en tu na wan dedewan. Mi arki san MASRA, mi Gado, taki mi èn mi du san Yu taigi mi fu du. 15Luku kmoto fu Yu santa oso na heimel èn blesi Yu folku Israel, leki fa Yu ben sweri gi den afo fu wi taki Yu bo du en. Blesi Yu folku nanga a kondre di Yu gi wi, wan kondre di bun èn pe ala sani e gro.”
16Tide MASRA, un Gado, e taigi unu taki un mus tan du den sani di un mus du èn tan hori unsrefi na den san sani na san un mus hori unsrefi. Un mus hori unsrefi finifini na den nanga un heri ati èn nanga un heri sili. 17Tide un taigi MASRA taki En sa de un Gado, taki un sa du den sani di un mus tan du, taki un sa hori den gebod fu En, nanga den sani na san un mus tan hori unsrefi èn taki un sa arki san A e taki. 18MASRA teki san un taigi En tide. Un sa de En eigi folku, leki fa A taigi unu èn un sa hori unu na ala den gebod fu en. 19Dan A sa gi unu moro makti moro ala folku di A meki. Den sa prijse unu, den sa gi un bigi nen èn ala sma sa taki fu unu. Un sa de wan folku, di poti aparti gi MASRA, un Gado, leki fa A taki.
