14 mei - Handelingen 15:36-16:10

₃₆Baka wan pisten Paulus taigi Barnabas taki: “Kon meki un drai go baka na ibri foto pe un ben ferteri a wortu fu Masra, fu si fa a e go nanga den bribisma.” ₃₇Dan Barnabas ben wani teki Yohanes tu, di den sma e kari Markus. ₃₈Ma Paulus no ben feni en bun, bika a ben gwe libi den di den ben de ini Pamfilia èn a no ben yepi den moro fara nanga a wroko. ₃₉Di den no ben man feni densrefi kwet'kweti, den prati pasi. So Barnabas teki Markus, dan den teki wan sipi go na Siprus. ₄₀Ma Paulus teki Silas fu go nanga en. Dan baka di den bribisma poti den ini Masra anu fu A yepi den, den gwe. ₄₁Dan Paulus go na Siria nanga Silisia pe a meki den gemeente kon tranga ini a bribi.

₁Paulus doro tu na den foto Derba nanga Listra. Drape a miti nanga wan bribisma di ben nen Timoteus. A m'ma fu en ben de wan Dyusma di ben teki bribi, èn en p'pa ben de wan Grikisma. ₂Den bribisma fu Listra nanga Ikonium ben sabi en leki wan bun man. ₃Paulus ben wani fu Timoteus go nanga en. So a teki en dan a besnei en fu den Dyusma ede, bika den ben sabi taki en p'pa ben de wan Grikisma. ₄Di den psa ini den foto, den taigi den sma fu den besroiti di den boskopuman fu Yesus nanga den fesiman fu a gemeente ben teki na Yerusalem. Dan den aksi den fu hori densrefi na den besroiti disi. ₅So den gemeente kon tranga ini a bribi, èn ibri dei moro nanga moro sma ben teki bribi.

₆Paulus nanga den trawan psa ini Frigia nanga Galasia, ma a Santa Yeye no ben wani taki den tyari a wortu fu Gado ini Asia. ₇Di den doro na Misia, den ben meki muiti fu go na Bitinia, ma a Yeye fu Yesus no ben wani. ₈So den psa ini Misia dan den go na a foto Troas. ₉A neti dati Gado sori Paulus wan sani. A si fa wan man fu Masedonia tnapu e begi en taki: “Abra kon na Masedonia fu yepi unu!” ₁₀Di Paulus si a sani disi, wi suku okasi wantron fu go na Masedonia, bika un ben kon ferstan taki na Gado e kari unu fu preiki a bun nyunsu gi den.