15 mei - Handelingen 16:11-24

₁₁So un kmopo nanga wan sipi na Troas, dan un go langalanga na Samotraka. A tra dei fu en un go na a foto Neapolis. ₁₂Fu drape un go na Filipi, a moro prenspari foto fu Masedonia. Den sma di ben libi drape ben de sma fu Roma. Dan un tan wantu dei drape.

₁₃Tapu a sabatdei un kmopo ini a foto go na libakanti, bika un ben ferwakti taki un ben o feni wan presi pe sma ben e kon makandra fu begi. Di un doro, un saka sidon dan un bigin taki nanga den umasma di ben kon makandra drape. ₁₄Wan fu den uma di ben arki unu, ben nen Lidia. A ben de fu a foto Tiatira èn a ben e seri purper krosi. A no ben de wan Dyusma, ma a ben e anbegi Gado. Dan Masra opo en ati fu a bribi san Paulus ben e taki. ₁₅Baka di Lidia nanga ala sma fu en oso teki dopu, a aksi unu fu kon tan na en oso. A taki: “Efu un e si mi leki wan sma di e bribi trutru ini Masra, dan un kon tan ini mi oso.” A aksi unu a sani dati te leki un go.

₁₆Wan tra dei di wi ben e go baka na a presi pe den sma ben e begi, un miti nanga wan uma. A ben de wan srafu èn a ben abi wan yeye na en tapu di ben e meki taki a si sani na fesi. Tapu sowan fasi a ben e wroko furu moni gi den basi fu en. ₁₇A uma disi ben e waka na wi nanga Paulus baka e bari taki: “Den man disi na knekti fu a Moro Hei Gado. Den e ferteri unu san un mus du fu Gado ferlusu unu.” ₁₈A du a sani disi wan heri pisten te leki a kon ferferi Paulus. So a drai taigi a yeye taki: “Ini a nen fu Yesus Kristus, mi e komanderi yu fu kmopo na en tapu!” A srefi momenti dati a yeye gwe libi a uma.

₁₉Di den basi fu a uma si taki den no man meki moni moro nanga en, den grabu Paulus nanga Silas, dan den srepi den go na wowoyo pe den bigiman fu a foto ben e sidon. ₂₀Den tyari den go na fesi den edeman disi dan den taki: “Den man disi na Dyusma, èn den e tyari dyugudyugu ini a foto fu unu. ₂₁Wi leki Romeinisma no man agri nanga den sani san den e leri, èn wi no e libi a fasi dati.” ₂₂A bigi grupu sma drape bigin fu krutu Paulus nanga Silas tu. Ne den edeman priti a krosi puru na Paulus nanga Silas skin, dan den meki den fon den. ₂₃Baka di den gi den wan bun fonfon, den srepi den go poti na straf'oso. Dan den taigi a man di ben e hori wakti na a straf'oso fu hori ai bun na den tapu. ₂₄Di den taigi en dati, a man tyari Paulus nanga Silas go sroto te na bakasei fu a straf'oso, dan a keti den futu bun.