18 mei - Psalm 71

₁Tye MASRA, na Yu mi e kibri,

noiti no meki mi kon na syen.

₂Yepi mi èn ferlusu mi,

bika na Yu e du sani nanga leti,

arki a begi fu mi,

èn ferlusu mi.

₃Yu na a Trangawan pe mi e kibri

wan kibripresi pe mi kan go ala ten.

Yu ben teki a besroiti fu ferlusu mi,

bika na Yu na a Trangawan,

mi tranga kibripresi.

₄Tye Gado, puru mi ini anu fu den ogri-ati sma,

ini a makti fu den takruwan,

nanga den di e du sani nanga tranga.

₅Tapu Yu mi e howpu,

Masra MASRA, tapu Yu mi poti mi fertrow,

sensi mi ben yongu ete.

₆Na tapu Yu mi ben bow,

sensi di mi kmoto ini mi m'ma bere,

na Yu ben yepi mi

di mi ben de ini mi m'ma bere ete,

na gi Yu mi sa singi ala ten.

₇A libi fu mi ben de wan eksempre gi furu,

na Yu ben de a tranga kibripresi fu mi.

₈Heri dei mi e gi Yu grani,

èn taki fa Yu bigi.

₉No poti mi na wan sei now di mi kon owru,

no gwe libi mi now di mi kon swaki.

₁₀Den feyanti fu mi e taki fu mi,

den wan di wani kiri mi

e kruderi makandra.

₁₁Den taki: “Gado gwe libi en,

un kan go na en baka now,

un kan grabu en now,

bika a no abi no wan sma fu ferlusu en.”

₁₂Tye Gado, no tan fara fu mi,

mi Gado, kon es'esi kon yepi mi.

₁₃Den sma di e suku fu kiri

meki den kisi syen,

meki den dede gwe,

Den sma di e angri fu bigi ogri miti mi,

meki den tron spot'popki,

meki syen naki den.

₁₄Mi sa tan howpu na Yu tapu,

mi sa gi Yu grani moro nanga moro.

₁₅Mi sa taki fa Yu e du sani na tapu wan leti fasi,

mi sa taki heri dei fu a ferlusu di Yu tyari,

a furu moro leki mi kan taki.

₁₆Mi sa ferteri fu den bigi wroko, di Masra MASRA du,

mi sa taki fu Yu wawan,

fa Yu e du sani nanga leti.

₁₇Gado, sensi di mi yongu Yu e gi mi leri,

dat' meki te tide mi e ferteri fu den wondru fu Yu.

₁₈Tye Gado, no gwe libi mi dan,

now di mi kon owru,

now di mi wiwiri kon weti.

Dan mi kan ferteri pikin nanga bakapikin,

fu a krakti fu Yu.

₁₉A du di Yu e du sani na tapu wan leti fasi,

psa marki,

Yu du bigi sani.

Gado, no wan no de leki Yu.

₂₀Yu meki mi psa furu benawtu,

furu ogri miti mi,

ma Yu o meki mi libi baka,

Yu o hari mi kon na loktu baka,

puru mi na ini a dipi fu grontapu.

₂₁Yu sa meki mi kisi moro grani leki san mi ben abi,

Yu sa trowstu mi baka.

₂₂Dan mi sa prijse Yu nanga harp,

fu a bow di mi kan bow na Yu tapu, mi Gado,

mi sa singi gi Yu nanga citer,

Santawan fu Israel.

₂₃Mi sa prisiri te mi e singi gi Yu,

mi sa singi nanga ala sani di de ini mi,

fu di Yu ferlusu mi.

₂₄Heri dei mi sa taki fa Yu e du sani nanga leti,

bika den sma di ben e angri fu bigi ogri miti mi,

kon na syen.