20 januari - 1 Korintiërs 12:12-31

₁₂A skin fu wi na wan, ma a abi furu pisi. Ma ala den pisi disi, awinsi fa den furu, e meki wan enkri skin. So a de tu nanga Kristus. ₁₃Bika na a wan enkri Yeye dopu wi alamala kon tron wan enkri skin. Awinsi un na Dyusma noso sma di no de Dyu, awinsi un na srafu noso sma di kon fri, wi alamala kisi a srefi Yeye. ₁₄A skin no abi wan pisi nomo, ma a abi furu pisi. ₁₅Efu a futu ben sa taki: “Fu di mi no de a anu mi no de wan pisi fu a skin,” yu denki taki na dati o meki taki a no de wan pisi fu a skin? ₁₆Efu a yesi ben sa taki: “Fu di mi no de a ai mi no de wan pisi fu a skin,” yu denki taki na dati o meki taki a no de wan pisi fu a skin? ₁₇Efu yu heri skin ben de soso ai, fa yu ben o man yere? Efu yu heri skin ben de soso yesi, fa yu ben o man smeri? ₁₈Ma Gado poti ibriwan fu den difrenti pisi tapu en presi ini a skin leki fa En ben wani. ₁₉Efu ala den pisi ben o de a srefi, dan wi no ben o abi wan skin. ₂₀Now a de so taki wi abi furu pisi, ma a de wan enkri skin. ₂₁Dat' meki a ai no kan taigi a anu taki: “Mi no abi yu fanowdu.” A ede no kan taigi a futu tu taki: “Mi no abi yu fanowdu.” ₂₂Ma a de so taki na den pisi fu a skin di gersi leki den na den moro swakiwan, na den dati wi abi moro tranga fanowdu. ₂₃Den pisi di no de so prenspari ini wi ai, na den dati wi e gi moro bun sorgu. Den pisi di un no wani fu sma si, den dati wi e tapu moro bun. ₂₄Ma dati no de fanowdu gi den pisi di bun fu si. Gado meki wi skin na sowan fasi taki den pisi di no sori prenspari, e kisi moro grani. ₂₅Disi mus sorgu taki pratifasi no de ini a skin, ma taki den pisi sa sorgu bun gi makandra. ₂₆Efu a no e go bun nanga wan pisi ala tra pisi e firi makandra nanga en. Efu wan pisi kisi grani ala den tra pisi e prisiri nanga en. ₂₇Unu na a skin fu Kristus. Ibriwan fu unu na wan pisi fu a skin. ₂₈Gado poti difrenti sma ini a gemeente. Na a fosi presi boskopuman fu Yesus. Na a di fu tu presi, profeiti. Na a di fu dri presi, leriman. Moro fara A poti sma di abi a krakti fu du bigi sani, sma di kisi presenti fu dresi sikisma, sma di man yepi trawan di abi yepi fanowdu, sma di man tiri trawan, nanga sma di e taki difrenti tongo. ₂₉A no ala sma na boskopuman fu Yesus. Ala sma a no profeiti. A no ala sma na leriman. A no ala sma man du bigi wondru. ₃₀A no ala sma kisi presenti fu dresi sma. A no ala sma man taki ini difrenti tongo, noso ferstan den difrenti tongo.

₃₁Unu mus du muiti fu kisi den moro prenspari presenti. Dan mi o sori unu wan moro bun pasi di de.