21 maart - Jesaja 50:4-11

₄Masra MASRA leri mi fa mi mus taki,

fu mi kan gi dek'ati na den wan di weri.

A e wiki mi ala mamanten,

A e wiki mi fu mi arki leki fa sma di e teki leri e arki.

₅Mi Masra MASRA gi mi wan yesi fu arki,

èn mi no kaka futu gi En.

Mi no drai mi baka gi En.

₆Mi no drai mi baka puru gi den di ben e naki mi.

Mi no hari mi fesi puru gi den wan di ben e hari mi barba puru.

Mi no drai mi fesi tu di den ben e kosi mi èn spiti ini mi fesi.

₇Ma fu di Masra MASRA yepi mi, mi no firi broko saka.

Mi no ben e seki awinsi san den ben e du,

bika mi sabi tak' mi no ben o kon na syen.

₈A Wan di o meki mi kisi mi leti, de krosbei.

Suma wan prefuru fu tyari mi go na krutu?

Meki un opo tnapu makandra.

Suma na a sma di o krutu mi?

Meki a waka miti mi!

₉Yere, mi Masra MASRA e yepi mi.

Suma o man taki tak' mi fiti fu kisi strafu?

Luku, den alamala de leki wan owru pisi krosi di kakalaka nyan.

₁₀Sortu wan fu unu e lespeki MASRA?

Suma arki san a knekti fu en e taki?

A sma di e waka na dungru presi,

presi pe no abi faya,

mus poti en fertrow tapu MASRA

èn bow tapu a Gado fu en.

₁₁Un alamala di e sutu presi na faya,

un di e waka nanga faya peiri,

un arki:

unsrefi o abi fu hari psa ini a faya di un meki,

un o bron unsrefi na den faya peiri di un sutu.

Na dati Mi o du nanga unu!

Un o kanti didon nanga bun hebi pen!