21 oktober - 2 Timoteüs 4:9-22

₉Du muiti fu kon her'esi na mi, ₁₀bika Demas gwe libi mi fu di a lobi den sani fu a grontapu disi. A go na Tesalonika. Kresens go na Galasia, èn Titus go na Dalmasia. ₁₁Lukas wawan de ete nanga mi. Te yu e kon, go teki Markus fu a kon nanga yu, bika a de wan bigi yepi gi mi na ini a wroko. ₁₂Mi seni Tikikus go na Efese. ₁₃Te yu e kon, yu mus tyari a mantel fu mi kon di mi ben libi ini Troas na Karpus oso. Sosrefi yu mus tyari den buku gi mi, ma funamku den wan di skrifi tapu meti buba. ₁₄Aleksander, a koprosmeti, du mi furu ogri. Masra o pai en fu san a du. ₁₅Yu mus luku bun nanga en tu, bika fayafaya a e feti san wi e leri.

₁₆A fosi leisi di mi go na krutu, no wan sma kon yepi mi. Ala sma libi mi, mi wawan. Meki Masra no hori den frantwortu fu dati. ₁₇Ma Masra ben de nanga mi èn A gi mi krakti fu mi kan preiki a heri boskopu. Na so ala den sma di no sabi Gado ben kan yere en. Èn Masra puru mi na grebimofo. ₁₈Iya, Masra o kibri mi fu ala sortu ogri èn A o meki mi doro bun na heimel pe A e rigeri leki Kownu. Na En mus kisi glori fu têgo èn ala ten! Amen.

₁₉Taki Priska, Akwila, Onesiforus nanga den ososma fu en, odi gi mi. ₂₀Erastus tan ini Korinte, èn mi ben abi fu libi Trofimus sikisiki na baka di mi gwe fu Mileta. ₂₁Meki muiti fu kon na mi fosi a kowruten. Ebulus, Pudens, Linus, Klaudia nanga ala den brada nanga sisa e seni odi gi yu.

₂₂Meki Masra de nanga yu èn meki A sori unu bun-ati.