23 augustus - Psalm 55:17-24

₁₇Ma mi, mi e kari Gado,

na MASRA o ferlusu mi.

₁₈Te neti, te mamanten nanga te bakadina mi e kragi, mi e dyeme,

èn A e arki mi.

₁₉A o ferlusu mi puru ini a strei, noti no o miti mi,

awinsi omeni e feti mi.

₂₀Gado, a Wan di de kownu ten na ten, e yere. sela

A sa broko den saka,

den di no wan tapu nanga a ogri fu den,

èn di no e lespeki Gado.

₂₁Na wan fu den sortu sma dati seri en mati,

a broko a banti di den ben abi leki mati.

₂₂A tongo fu en grati moro oli,

ma na feyantifasi de ini en ati.

Den wortu fu en safu moro botro,

ma den e dyuku leki nefi.

₂₃Gi MASRA den problema fu yu,

A o sorgu gi yu.

Noiti A sa meki taki wan sma di bun ini En ai misi futu.

₂₄Ma Gado, den kiriman nanga den bedrigiman dati,

Yu o meki den saka go ini a olo fu dedekondre.

Den no o doro afu fu a libi fu den.

Ma mi dati e fertrow na Yu tapu.