22Dan granman Feliks, di ben sabi heri bun fu a Nyun Pasi, tapu a krutu. A taigi den taki: “Te komandanti Lisias kon, mi sa koti krutu ini a tori disi.” 23Dan a taigi a ofisiri fu a hori Paulus na straf'oso, ma den no ben mus du nanga en leki fa den e du nanga den tra straf'man. Èn den no ben mus tapu den mati fu Paulus fu kon sorgu en.
Paulus na fesi Feliks nanga Drusila
24Wantu dei na baka Feliks kon drape nanga en wefi Drusila di ben de wan Dyusma. Dan a seni kari Paulus meki a ferteri en fu a bribi na ini Kristus Yesus. 25Ma di Paulus bigin taki fu san bun ini Gado ai, èn taki un mus hori unsrefi, èn taki Gado o krutu libisma, Feliks kon frede. Dat' meki a taigi Paulus taki: “A nofo fu tide. Te mi abi ten mi sa seni kari yu baka.” 26Ma a srefi ten Feliks ben e howpu taki Paulus ben o gi en moni. Fu dat'ede a ben e seni kari en ala yuru fu taki nanga en. 27Baka tu yari, Porsius Festus tron granman na Feliks presi. Ma fu di Feliks ben wani du den Dyusma wan bun, meki a libi Paulus ini a straf'oso na baka.
