7Gado fu den folku di de krosbei noso farawe lontu unu, noso awinsi pe fu grontapu,” 8dan un no sa du dati èn un no sa arki san a e taki. Un no sa abi sari-ati nanga en. Un no sa libi en fu a go. Un no sa kibri a ogri fu en tu, 9ma un sa kiri en nomonomo. Yu mus de a fosi wan fu fringi ston na en tapu. Baka dati a heri folku sa fringi ston na en tapu. 10Un mus fringi ston kiri en, fu di a pruberi fu meki un libi MASRA, un Gado, di puru unu ini Egipte, pe un ben de srafu. 11Heri Israel sa yere èn sma sa frede fu du sowan ogri baka na un mindri.
12Efu un yere taki na ini wan fu den foto di MASRA, un Gado, o gi unu fu libi 13wantu soso man opo di meki den sma fu a foto libi Gado fu di den taigi den taki: “Meki un go dini tra gado di un no sabi” 14dan un mus ondrosuku a tori bun èn aksi efu a tru. Efu a sori taki a tru taki sowan sani psa, taki den du a ogri sani disi na un mindri, 15dan un sa kiri den sma fu a foto dati nanga un deigri. A heri foto un mus kiri. Libisma nanga meti. 16Ala den gudu di un teki fu den sma, un mus tyari kon na wan tapu a pren, dan un e bron a heri foto nanga ala den gudu leki wan ofrandi gi MASRA, un Gado. A foto mus tan didon leki wan broko pranasi. Un no mus bow en baka. 17Un no mus hori noti na baka gi unsrefi, fu den sani disi di ben mus bron leki wan ofrandi. Dan a atibron fu MASRA sa saka. A sa sori unu sari-ati, A sa sori un En lobi èn meki taki un kon furu leki fa A ben pramisi den afo fu unu. 18Bika un arki san MASRA, a Gado fu unu, taki. Un hori unsrefi na ala den gebod di mi leri un tide èn un du san bun ini a ai fu MASRA, un Gado.
