29MASRA, un Gado, o puru den folku na pasi fu a kondre pe un e hari go. Te un teki a kondre abra èn te un e libi ini a kondre fu den, 30un mus luku bun taki den no kori unu fu du san den ben e du. No go suku den gado fu den. No aksi yusrefi taki: “Fa den folku disi ben e dini den gado fu den?” Na so un wani du en tu. 31Un no mus dini MASRA, un Gado, a srefi fasi. Bika ala den sani di den ben e du gi den gado fu den, na sani di MASRA no lobi srefsrefi. Na wan groskin sani gi En. Den ben e bron den manpikin nanga den umapikin fu den srefi gi den gado fu den.
32Un mus hori unsrefi bun na ala sani di mi komanderi unu. Un no sa poti noti moro, èn un no sa puru noti fu den tu.
Deuteronomium 13
1Efu wan profeiti na un mindri noso wan sma di e si sani na ini dren taigi unu taki wan marki noso wan wondru o psa, 2dan a marki noso a wondru psa tu ma a e taigi un tu taki: “Meki un waka baka tra gado, di un no ben sabi èn meki un dini den,” 3dan un no sa arki den sani di a profeiti noso a sma di e si sani ini dren e taigi unu. Bika na tesi MASRA, un Gado, e tesi unu fu luku efu un lobi MASRA, un Gado, nanga un heri ati èn nanga un heri sili. 4Un sa waka baka MASRA, un Gado, wawan. Na En un mus lespeki. Un mus hori un na den gebod fu En, èn na En sten wawan un mus arki. Na En wawan un mus dini èn na En sei wawan un mus tan. 5Un mus kiri a profeiti noso a sma di dren a dren, bika a e taigi unu fu un du sani di MASRA, un Gado, no wani. Tapu a fasi dati a wani puru unu fu a pasi di MASRA, un Gado, taigi unu taki un fu waka. Na so un mus tyari wan kba kon na a ogri na un mindri. Bika na MASRA, un Gado, puru unu na ini Egipte, pe un ben de srafu.
6Efu yu brada, a manpikin fu yu m'ma, yu manpikin, yu umapikin, yu eigi frow noso a moro bun mati fu yu wan kori yu bakabaka fu taigi yu taki: “Kon meki wi go dini tra gado. Gado di yu noso den afo fu yu no ben sabi.
