10Yere, mi o pai den man di o kapu den bon neigitenti dusun saka tarwe, neigitenti dusun saka groto, aiti hondro dusun liter win, nanga aiti hondro dusun liter oleifoli.”
11Dan kownu Huram fu Tyrus, seni piki Salomo ini wan brifi taki: “Fu di MASRA lobi a pipel fu En, A poti yu leki kownu fu tiri den.” 12A skrifi moro fara ini a brifi: “Grani fiti MASRA, a Gado fu Israel, di meki heimel nanga grontapu. Bika A gi kownu David wan koni manpikin di abi ferstan, di srapu èn di wani bow wan tempel gi MASRA, nanga wan kownu-oso gi ensrefi. 13Mi o seni wan man gi yu di sabi a wroko, wan man di srapu. A nen Huram-Abi. 14A de a manpikin fu wan uma fu a lo fu Dan, en p'pa ben de wan man fu Tyrus. A sabi wroko gowtu, solfru, kopro, isri, ston, udu, dungruredi katun, blaw katun, soifri linnen nanga faya redi krosi èn a sabi tyerfi prenki tapu sani. A man meki ala sani tu di sma e taigi en fu meki. Makandra nanga den man fu yu di sabi a wroko nanga den di fu yu p'pa, masra David, a o du ala san yu komanderi en. 15We masra, seni a tarwe, a groto, a oli nanga a win kon di yu pramisi den knekti fu yu, 16dan wi sa go kapu someni bon leki yu wani na a Libanonbergi. Wi sa tai den bon dati na wan dan wi o tyari den abra se go na Yafo. Fu drape yu kan tyari den go na Yerusalem.”
17Dan Salomo teri ala den mansma fu den doroseisma di ben e libi ini Israel, neleki fa en p'pa David ben du kba. A sori tak' na wan hondro feifitenti-na-dri dusun nanga siksi hondro mansma ben de.
