1Salomo bigin nanga a bow fu a tempel tapu a bergi Moria na Yerusalem, pe MASRA ben sori Ensrefi na en p'pa David. David ben besroiti taki a oso ben mus meki na a presi pe a Yebusitiman Ornan ben masi buba puru na a graan. 2Salomo bigin nanga a bow di a ben de fo yari na makti. Ini a di fu tu mun fu a yari dati a bigin, tapu a di fu tu dei. 3A ben abi tapu papira fa a ben o bow a oso fu Gado. A oso ben o langa dritenti meter èn a ben o bradi tin meter. A wroko nanga a owru marki. 4A gadri na fes'sei ben langa tin meter leki fa a oso ben bradi èn a ben hei siksi tenti meter. Salomo meki den tapu en fu inisei nanga lala gowtu. 5A meki den poti sipres-udu na a heri inisei skin fu a bigi kamra. Baka dati a meki den tapu ala a udu nanga lala gowtu, dan a meki den tyerfi palmbon nanga keti na ini. 6Fu moi a kamra moro, a meki den poti diri ston ini a gowtu na a skin fu a kamra. A gowtu ben kmoto fu Parwaim. 7A meki den tapu a heri kamra nanga gowtu. No wawan a kamraskin nanga den doro, ma den postu nanga den kosen tu. Dan a meki den tyerfi kerub ini a gowtu fu a kamraskin. 8Baka dati a meki a moro santa presi. A kamra dati ben bradi tin meter, neleki a oso, èn a ben langa tin meter tu. Dan a meki den tapu den skin fu a kamra nanga tin-na-aiti dusun kilo lala gowtu. 9Den spikri ben meki nanga feifi hondro gran gowtu. A meki den tapu den seiplanga fu den kamra na loktusei nanga gowtu tu.
