18Ini ala den foto fu den lo fu unu di MASRA, un Gado, gi unu un sa poti krutubakra nanga ofisiri. Den sa koti krutu gi a folku tapu wan reti fasi. 19Un no sa krutu tapu wan kruktu fasi. Un no sa de na a sei fu wan sma èn un no sa teki kado fu den sma. Bika wan kado kan meki wan koniman tapu en ai èn a e meki den drai a tori fu a sma di abi leti. 20Un sa du ala muiti fu sani psa tapu wan leti fasi. Dan un sa tan na libi fu teki a kondre abra di MASRA, un Gado, sa gi unu.
21Te un meki wan altari gi MASRA, un Gado, un no sa poti no wan postu fu wan gado noso tra postu na en sei. 22Un no sa poti no wan ston tnapu tu. Bika MASRA, un Gado, no lobi dati srefsrefi.
Deuteronomium 17
1Un no sa srakti wan kaw, wan skapu noso wan krabita di malengri noso di abi wan tra sani di no fiti, gi MASRA, un Gado. Bika dati na wan groskin sani gi MASRA, un Gado.
2Efu wan man noso wan uma de ini wan fu den foto di MASRA, un Gado, o gi unu, di no hori en na a ferbontu, fu di a e du wan sani di no bun ini a ai fu MASRA, un Gado, 3fu dini tra gado, a son, a mun noso tra sani di de na loktu na heimel èn fu boigi gi den, aladi mi taigi unu taki un no mus du en, 4èn wan sma kon taigi unu noso un kon kisi fu yere en, dan un mus ondrosuku finifini efu a de so. Efu a sori taki a tru taki sowan ogri psa trutru na ini Israel, 5un mus tyari a man noso a frow di du a ogri disi go na a bigi doro fu a foto dan un fringi ston kiri en. 6Efu tu noso dri ketoigi taki tak' na so a de, dan un sa kiri a sma di mus kisi a strafu. Efu wan ketoigi nomo de un no sa kiri en. 7Den ketoigi sa de den fosi sma di mus fringi ston fu kiri en. Baka dati a heri folku sa fringi ston gi en. Tapu a fasi disi un mus tyari wan kba kon na a ogri na un mindri.
