8Efu tori de fu krutu den foto fu unu èn wan tori de di tranga tumsi gi unu fu krutu soleki wan kiri tori, wan tori pe a no de krin suma mus kisi leti, noso wan tori pe wan sma gi wan trawan mankeri, dan un sa go na a presi di MASRA, un Gado, sa sori unu. 9Un sa go na den lefiti priester nanga a krutubakra di drape, dan un aksi den rai. Dan den sa krutu a tori. 10Un sa du san den man disi, fu a presi di MASRA sori unu, taigi unu fu du. Un sa du ala sani finifini di den taigi unu taki un mus du. 11Un sa du san den taigi unu fu du èn un sa hori un na a besroiti di den meki. Un no sa beni noso drai a besroiti di den teki. 12Den mus kiri a sma di denki taki a tranga, dan a no du san a priester noso a krutubakra taigi en. Bika den e du a wroko ini a nen fu MASRA, un Gado. Tapu a fasi disi un mus tyari wan kba na a ogri ini Israel. 13A heri folku sa yere disi èn den sa frede fu den du a sani disi.
A fasi fa a kownu mus tyari ensrefi
14Te un doro ini a kondre di MASRA, un Gado, o gi unu èn, teki en abra èn un e libi na ini, dan un taki: “Un wani wan kownu tu leki fa ala den folku di lontu unu,” 15dan un sa teki wan kownu di MASRA, un Gado, sa sori unu. Un sa teki wan sma fu un eigi folku leki kownu gi unsrefi. Un no sa teki wan doroseisma di no de wan sma fu un folku leki un kownu. 16A kownu no sa wani furu asi èn a no sa seni sma fu en folku go baka na Egipte fu go bai asi. Bika MASRA taigi un taki: “Noiti moro un sa drai go baka tapu a pasi dati.” 17A kownu no sa abi furu frow tu. Noso dati o meki a tapu fu dini Gado. A no sa abi tumsi furu solfru nanga gowtu tu.
18Te a kownu sidon na tapu en kownusturu, a sa seni sma go na den lefiti priester di abi a wèt, meki den skrifi en gi en fu a kan abi en tu gi ensrefi. 19A sa abi a wèt na en, èn a sa leisi na ini en heri libi langa. Tapu a fasi dati a sa leri fu leri fu lespeki MASRA, en Gado, èn hori ensrefi bun na ala den wortu fu a wèt nanga ala den sani di a mus tan du. 20Dan a no sa firi ensrefi moro hei moro den tra sma fu en folku, noso du wan sani di a wèt e taki tak' a no mus du. Sofasi en nanga den manpikin fu en sa tan langa ten na ini Israel.
