1Den lefiti priester, sobun a heri lo fu Lefi, no sa abi wan pisi gron gi densrefi leki den tra sma fu Israel. Den sa libi fu den ofrandi fu MASRA, di e bron nanga faya. 2Den no sa abi wan pisi gron fu densrefi. MASRA sa sorgu gi den, leki fa A ben pramisi den. 3Te wan sma fu a folku tyari wan kaw, wan skapu noso wan krabita kon fu srakti leki ofrandi, a sa gi den priester den skowru, den wang nanga a maag fu a meti, fu di den abi a leti fu kisi en. 4Un sa gi den priester den fosi nyanyan di un koti fu a karu, a moro bun win nanga oli di un meki fu den fosi froktu di den koti, nanga a moro bun wiwiri fu un skapu. 5Bika na den MASRA, un Gado, teki na mindri fu ala den lo fu unu, fu en nanga den manpikin fu en tnapu fesi MASRA fu du a wroko ini En nen, fu têgo. 6Efu wan Lefitiman kon tan ini wan fu den foto fu unu ini Israel, leki wan doroseisma, èn a angri fu go na a presi di MASRA sa sori unu, 7fu go wroko ini a nen fu MASRA, en Gado, leki den tra Lefitifamiri fu en, di e wroko drape na MASRA fesi, 8un sa gi en den srefi sani leki den tra Lefitiman. Un no sa luku na den sani di a kisi fu di famirigudu fu en seri.
