9Te un doro ini a kondre di MASRA, un Gado, o gi unu, un no sa du densrefi groskin sani di den folku drape e du. 10No wan sma sa de na un mindri di sa bron en manpikin noso en umapikin leki ofrandi. No wan sma sa de tu na un mindri di e koti luku fu sabi san de fu kon. No wan sma sa de na un mindri di e koti luku gi trawan. No wan sma sa de na un mindri di e leisi karta gi sma fu si fa den libi o lon. No wan tofruman sa de tu na un mindri, 11no wan bonuman, no wan sma di man kari yorka fu dedesma noso tra yeye fu aksi den rai. 12Bika MASRA e si ibrisma di e du den sani disi leki wan groskin sani èn na fu den sani disi ede MASRA, un Gado, e yagi den folku gwe gi unu. 13Unsrefi no sa du den sani disi fesi MASRA, un Gado. 14Bika den folku disi di un o yagi gwe, e arki san den sma e taki di e koti luku gi trawan nanga den sma di e leisi trawan anu fu sabi san de fu kon. Ma MASRA, un Gado, no wani unu du den sani dati. 15MASRA, un Gado, sa seni profeiti kon gi unu. Wan sma fu un eigi folku leki mi. Na en un mus arki. 16Unsrefi ben aksi MASRA, un Gado, na a Horeb-bergi, fu A du dati, tapu a dei di un ben kon makandra. Un ben taki tak': “Un no wani yere a sten fu MASRA, un Gado, moro langa èn un no wan si a bigi faya disi tu noso un o dede.” 17Ne MASRA taigi mi taki: “Na wan bun sani den aksi. 18Mi sa seni profeiti gi den. Sma fu den eigi folku, leki yu. Mi sa poti den wortu fu Mi na ini den mofo èn a sa taigi den ala sani di Mi taigi en fu taigi den. 19Mi aksi frantwortu na a sma di no arki den sani di a taki na ini Mi nen. 20A profeiti sa dede di abi a dek'ati fu taki wan sani di Mi no taigi en fu taki, dan a taki tak' na Mi taki en.” 21Efu un sa aksi unsrefi taki: Ma fa un kan sabi efu na wan sani di MASRA no taki? 22dan na disi na a fasi fa un sa sabi: Efu wan profeiti taki wan sani ini a nen fu MASRA, ma a sani di a taki no psa fu sori taki a tru, dan na wan sani di MASRA no ben taki. Na lei a ben e lei. Un no sa frede gi sowan profeiti.
