7Te na tapu bun hei bergi yu go didon meki lobi,
èn srefi drape yu kren go fu tyari ofrandi.
8Yu poti den marki di mus memre yu na den san disi,
baka yu doro nanga na yu doro postu.
Yu drai yu baka gi Mi,
yu meki yu bedi,
yu kren go na en tapu,
dan yu meki presi tapu yu bedi gi suma wani kon.
Yu meki mofo nanga den omeni moni den ben mus pai.
Nanga prisiri yu ben e sribi nanga den,
èn yu no ben man puru yu ai fu den manpresi.
9Yu hari go na a gado Molok nanga oli
èn nanga wan lo switismeri.
Yu seni boskopu go bun fara,
go te na dedekondre srefi.
10Den langa pasi weri yu skin,
ma noiti yu taki: “Mi no man moro.”
Na fu di yu e feni nyun krakti meki yu no e weri.
11Gi suma yu abi someni lespeki?
Gi suma yu e frede so taki yu e lei gi Mi?
Yu no e prakseri Mi moro,
yu no abi ten gi Mi moro.
Mi tan tiri tumsi langa,
dat' meki un no abi lespeki moro gi Mi.
12Mi sa tyari den sani kon na doro di yu e du,
den sani di yu denki taki den bun,
ma di no man yepi yu.
13Meki ala den kruktu gado fu yu yepi yu
te yu o bari suku yepi.
Winti o opo den alamala,
pikinso winti nomo o wai den alamala gwe.
Ma den di e kibri na Mi o kisi a kondre
nanga a santa bergi fu Mi gi densrefi.
