Gado o trowstu den di e saka densrefi
14Dan A taki:
“Hei en! Hei en! Seti a pasi!
Puru ala sani fu a pasi gi a pipel fu Mi, di kan meki den fadon.”
15Na disi a Wan e taki di hei,
èn di fiti fu kisi a moro hei grani,
A Wan di e libi fu têgo
A Wan di santa:
Mi e libi na wan hei èn santa presi,
ma Mi de tu nanga den di e sari fu den ogri di den du,
nanga den di abi sakafasi,
fu gi nyun krakti na den di abi sakafasi,
nanga den di e sari fu den ogri di den du.
16Iya, Mi no o tan krutu den fu têgo,
èn Mi ati no o tan bron na den tapu fu têgo tu.
Bika efu Mi du dati den o kon swaki,
èn na Mi na a Wan di e gi a libibro.
17Na fu a kruktudu fu den,
a bigi ai di den abi tapu trawan sani,
meki Mi ati ben bron dan Mi strafu den.
Mi ben e kibri gi den te Mi ati ben e bron.
Ma den drai den baka gi Mi
èn den go den eigi pasi.
18Mi si a fasi fa den e tyari densrefi,
ma Mi o dresi den,
Mi o tiri den,
Mi o gi den freide,
Mi o sori den sari-ati,
èn Mi o meki a mofo fu den wan di e sari, prijse Mi taki:
19Freide! Freide!
Gi den di de fara nanga gi den di de krosbei.
So MASRA taki.
Èn Mi o dresi den.
20Ma den ogri-ati sma de leki a se
di e rigeri dorodoro sondro kba.
A e tyari doti nanga tokotoko kon na loktu.
21Den ogri-ati sma no sa abi freide,
Na so Mi Gado taki.
