4 juli - Galaten 5:1-12

₁Kristus meki wi fri, fu wi de fri fu tru. So un mus tnapu tranga. No meki no wan sma poti un ini katibo baka leki srafu. ₂Luku, mi Paulus e taigi un taki: Efu un meki den besnei unu, dan Kristus no sa abi no wan warti moro gi unu. ₃Wantron moro mi e taigi ala sma di wani fu besnei taki den o abi fu du ala sani san a wèt e taki. ₄Efu un e hori a wèt fu kan kon bun ini Gado ai, dan na broko un broko nanga Kristus. Dan Gado no man sori unu En bun-ati. ₅Ma nanga bribi wi e ferwakti taki nanga a yepi fu a Santa Yeye, wi o kisi san wi e howpu fu kisi: wi o kon bun ini Gado ai. ₆Bika efu wi de wan nanga Kristus Yesus, a no e teri efu wi besnei noso efu wi no besnei. Ma san e teri na bribi, di de fu si ini a lobi san wi e sori trawan.

₇Un ben de bunbun na tapu a pasi. Suma hori unu, meki un no e du moro san a tru leri e taki? ₈A no Gado meki un kenki prakseri, bika na En kari unu. ₉Leki fa a odo e taki: “Pikinso dyesi sari kba fu meki a heri blon sweri.” ₁₀Èn mi abi a fertrow taki fu di wi de wan nanga Masra, un abi a srefi denki leki mi. Ma a sma di e bruya unu, o kisi en strafu, awinsi suma na en. ₁₁Brada nanga sisa, sma e feni taki mi e leri ete taki wan sma mus besnei. Ma efu a de so, dan fu sanede den de na mi baka fu du mi ogri dan? Bika efu mi e leri dati ete, dan no wan sma no ben o abi problema moro nanga a boskopu fu san Yesus du na a kroisi. ₁₂We, efu den man di e bruya unu wani besnei nomonomo, dan meki den koti a heri sani fu den puru dan!