5 juli - Galaten 5:13-26

₁₃Brada nanga sisa, Gado kari unu fu un de fri. Ma un no mus teki a fri disi fu du san a sondufasi fu unu e firi fu du. Ma nanga lobi un mus dini makandra. ₁₄Bika ala sani san a wèt e taki, yu kan poti ini a wortu disi: “Yu mus lobi tra sma soleki fa yu lobi yusrefi.” ₁₅Ma efu un e beti èn priti makandra leki meti, dan un mus luku bun taki un no swari makandra. ₁₆San mi wani taki na disi: Un meki a Yeye tiri unu, èn no du san a sondufasi fu unu e firi fu du. ₁₇Bika den sani san a sondufasi fu un e firi fu du, no e akruderi nanga san a Yeye wani. Èn san a Yeye wani du, no e akruderi nanga san a sondufasi fu unu e firi fu du. Den tu sani disi no e koti nanga densrefi. Dat' meki un no man du san un ben sa wani. ₁₈Ma efu yu e meki a Yeye tiri unu, dan un no abi fu du san a wèt e taki. ₁₉Bika un alamala sabi den sani san a sondufasi fu wi e tyari kon na doro. Dati na: gi yusrefi abra na takru lostu, dot'libi, yayolibi, ₂₀afkodrei, tofruwroko, hori sma na feyanti, meki trobi, bigi-ai, èn fu kisi atibron es'esi. Moro fara: fu prakseri yusrefi wawan, fu tyari prati kon mindri sma nanga grupu fu sma, ₂₁dyarusufasi, drungufasi, fu e gi fesa nomo, èn moro fu den sortu sani dati. Fu den sani disi mi e warskow unu, èn mi ben warskow unu kba taki den sma di e du den sortu sani disi, no o man kon ondro a tiri fu Gado. ₂₂Ma a froktu fu a Yeye na lobi, prisirifasi, freide, langa pasensi, switi maniri, bunfasi, èn taki sma kan bow na yu tapu. ₂₃Moro fara safri-ati, èn taki yu man hori yusrefi. No wan wèt e taki tak' den sani disi no bun. ₂₄Bika den sma di de fu Kristus Yesus, spikri a sondufasi fu den na a kroisi makandra nanga den takru lostu fu en nanga den sani san a wani abi. ₂₅Efu a Yeye e meki taki wi e libi, dan wi mus meki a Yeye tiri wi libi. ₂₆Wi no mus meki bigi gi wisrefi, bika tapu a fasi dati un o suku sma mofo èn tyari dyarusu kon tu.