8 juni - Johannes 7:37-52

₃₇A laste dei fu a Sukotfesa na a moro bigi dei. A dei dati Yesus opo tnapu dan A bari taki: “Efu watra e kiri wan sma, meki a kon na Mi fu dringi! ₃₈A Santa Buku e taki: Liba fu watra di e gi libi, o lon kmoto inisei fu a sma di e bribi ini Mi.” ₃₉Di Yesus taki a sani dati, A ben e taki fu a Santa Yeye san den sma ben o kisi di teki bribi ini En. Bika te leki a ten dati a Santa Yeye no ben kon ete, fu di Yesus no ben go na heimel ete.

₄₀Di den sma yere san Yesus taki, sonwan fu den taki: “Trutru, a man disi na a Profeiti!” ₄₁Trawan taki: “Disi na a Mesias!” Trawan baka taki: “A Mesias no o kmoto fu Galilea. ₄₂Bika a Santa Buku e taki tak' a Mesias o de wan bakapikin fu David, èn A o kmoto fu Betlehem, a foto pe David ben e libi.” ₄₃Na so prati ben kon mindri den sma fu Yesus ede. ₄₄Sonwan fu den ben wani grabu En, ma no wan sma no fasi En.

₄₅Den waktiman drai go baka na den prenspari priester nanga den Fariseiman, dan den man dati aksi den taki: “Sanede un no tyari En kon?” ₄₆Den waktiman piki den taki: “Noiti ete wan man taki leki fa a man disi e taki.” ₄₇Dan den Fariseiman taigi den taki: “Na drai A drai un ede tu? ₄₈No wan edeman fu unu èn no wan fu den Fariseiman e bribi ini En. ₄₉Ma Gado sa fluku ala den sma disi di no sabi a wèt fu Moses!” ₅₀Dan Nikodemus, wan fu den Fariseiman di ben kon wan leisi na Yesus, taigi den taki: ₅₁“A wèt fu unu e taki tak' un no kan leisi strafu gi wan sma efu un no arki fosi san a e taki èn ondrosuku san a e du.” ₅₂Den piki en taki: “Yu na fu Galilea tu? Go ondrosuku Gadowortu, dan yu o si taki no wan profeiti e kmoto fu Galilea.”