Yérémia 39

₁Waktu Yérusalèm direbut, sak njeruhné taun sing kaping sanga pepréntahané Sedèkia, ratu ing Yéhuda, ing sasi sepuluh, Nebukadnésar, ratuné Babèl, ditutké suradaduné, ngepung kuta Yérusalèm; ₂ing sak njeruhné taun sing kaping sewelas pepréntahané Sedèkia, ing sasi papat, waktu tanggal sanga sasi kuwi, témboké kuta kuwi direbut ₃para penggedéné ratu Babèl kuwi, terus ngenggoni gapura tengah, ya kuwi: Nergal-Saréser, penggedéné sangka Sin-Magir, komendané perang lan Nebusasban, penggedéné kraton lan para pahlawan liyané, abdiné ratu Babèl.

₄Bareng Sedèkia, ratuné Yéhuda, ngerti kuwi kabèh terus mblayu, ditutké para suradaduné, enggoné ninggalké kuta kuwi ing wayah mbengi, metu dalan ing petamanan ratu, ngliwati gapura ing antarané témbok loro, terus mlaku nuju ing Araba-Yordan. ₅Nanging diuber karo para suradadu Kasdim lan Sedèkia dityandak ing legokan Yériko; piyambaké dityekel terus dituntun menyang Ribla, ing negara Hamat, nang ngarepé Nebukadnésar, ratuné Babèl, sing netepké paukumané. ₆Ratu Babèl terus ngongkon mbelèh para anaké Sedèkia nang ngarepé ing Ribla; kabèh penggedéné Yéhuda pada dibelèh uga karo ratu Babèl. ₇Terus mripaté Sedèkia dityuplak, terus diketyèk karo ranté tembaga, diukum menyang negara Babèl. ₈Para suradadu Kasdim pada ngobongi kraton lan omah-omahé rayat, terus ngambrukké témboké Yérusalèm. ₉Nébusaradan, penggedéné suradadu pengawal, terus nyekel para turahané rayat sing ijik ing kuta kuwi lan wong-wong pada mbalik mèlu ngetutké mungsuh uga turahané para pegawé tyilik, pada dibuwang menyang Babèl. ₁₀Nanging sak bagéan rayat, ya kuwi para wong mlarat sing ora nduwé apa-apa, ditinggal ing negara Yéhuda karo Nébusaradan, penggedéné prajurit pengawal. Ing waktu semono wong-wong pada dikèki kebon anggur lan kebon dadi duwèké.

₁₁Kanggo Yérémia, Nebukadnésar, ratuné Babèl, wis mréntah marang Nébusaradan penggedéné suradadu pengawal, mengkéné: ₁₂“Wong kuwi boyongen lan mbok opènana, aja kok apak-apakké, nanging turutana apa sing dadi penjaluké marang kowé!” ₁₃Nébusaradan, penggedéné suradadu pengawal lan Nebusasban, penggedéné kraton lan komendané perang Nergal-Saréser lan kabèh pahlawané ratu Babèl, pada kongkonan wong, ₁₄pada dipréntahké nuntun Yérémia sangka plataran penjagan, terus dipasrahké marang Gedalya, anaké Ahikam, anaké Safan supaya diluwari, bèn mulih menyang omahé. Mengkono dadiné Yérémia tetep manggon ing sak tengahé rayat.

₁₅Waktu Yérémia ijik diukum ing plataran penjagan nampa pitutur sangka GUSTI, mengkéné: ₁₆“Maranana Ebed-Mèlèk, wong Etiopia kuwi lan omongana: Mengkéné tembungé GUSTI sing ngwasani langit lan bumi, Gusti Allahé Israèl: Tenan, tembung-Ku kanggo kuta iki bakal Tak leksanani kanggo tyilakané lan ora kanggo kabetyikané lan kuwi kabèh bakal kelakon ing ngarepmu ing waktu kuwi uga. ₁₇Ing waktu kuwi uga, mengkono tembungé GUSTI, Aku bakal ngluwari kowé lan ora Tak pasrahké nang tangané wong sing kok wedèni, ₁₈nanging Aku mesti bakal ngluwari kowé; kowé ora bakal mati karo pedang, nyawamu bakal kok rebut kaya rayahan, awit kowé pertyaya marang Aku. Mengkono tembungé GUSTI.”