Yosua 21

₁Para penggedéné brayaté wong Lévi terus pada nemoni imam Elièsar lan Yosua, anaké Nun lan marang para penggedéné brayaté taler Israèl. ₂Terus pada ngomong marang dèwèké ing Silo tanah Kanaan mengkéné: “GUSTI wis ngekèki préntah lantaran Moses, supaya kula dikèki kuta-kutané sing pada kula enggoni, lan pangonané kanggo kéwan-kéwan kula.” ₃Wong Israèl terus masrahaké kuta-kuta sing diarani ing ngisor iki kabèh pangonané kanggo wong Lévi, dijukukké sangka tanah pandumané miturut préntahé GUSTI.

₄Dilotré terus tiba marang turunané wong Kéhat. Tunggalé wong Lévi sing klebu tyedak turunané imam Harun pada olèh lotréan kuta telulas sangka taler Yéhuda, taler Siméon lan taler Bényamin. ₅Nanging turahé wong Kéhat kuwi pada olèh kuta sepuluh karo dilotré sangka taler Efraim, taler Dan lan sangka separo taler Manasé. ₆Turunané Gèrson pada olèh kuta telulas karo dilotré sangka taler Isakar, taler Asyèra, taler Naftali lan sangka separoné taler Manasé ing negara Basan.

₇Turunané Mérari pada olèh kuta rolas karo dilotré sangka taler Rubèn, taler Gad, lan taler Sébulon. ₈Mengkono dadi kuta-kuta mau kabèh pangonané pada dipasrahké wong Israèl marang wong Lévi karo dilotré, kaya sing wis dipréntahké GUSTI lantaran Moses. ₉Sing dipasrahké sangka taler turunané Yéhuda lan sangka taler turunané Siméon kuwi kuta-kuta sing diarani ing ngisor iki:

₁₀Para tyedak turunané imam Harun, sing klebu turunané wong Kéhat, tunggalé turunané Lévi, awit kuwi sing pada nampa lotréan sing wiwitan, ₁₁kuwi pada dipasrahi Kiryat-Arba, ya kuwi Hébron, - Arba kuwi leluhuré taleré wong Enak, - ing pegunungan Yéhuda, kabèh lemah pangonané sak ubengé; ₁₂nanging tegalé kuta kuwi lan désané kuwi wis dipasrahké marang Kalèb anaké Yéfuné dadi duwèké.

₁₃Tyedak turunané imam Harun kuwi pada diwènèhi Hébron, kuta pangungsèné wong dosa awit matèni, kabèh lemah pangonan, Libna, ₁₄Yatir sak lemah pangonané, Etemoa sak lemah pangonané, ₁₅Holon sak lemah pangonané, Debir sak lemah pangonané, ₁₆Ain sak lemah pangonané, Yuta sak lemah pangonané lan Bèt-Sémes sak lemah pangonané: kuta taler loro mau. ₁₇Sangka taler Bényamin: Gibéon sak lemah pangonané, Géba sak lemah pangonané, ₁₈Anatot sak lemah pangonané lan Almon sak lemah pangonané: kuta papat. ₁₉Kutané tyedak turunané imam Harun, ya kuwi para imam, kuwi kabèh ana kuta telulas sak lemah pangonané.

₂₀Turunané Kéhat, ya kuwi turahané wong Lévi, sangka antarané turunané Kéhat mau, kuwi olèh pandumané kuta-kuta sing karo dilotré sangka taler Efraim. ₂₁Kuwi pada dikèki Sikem, kuta pangungsèn wong dosa awit matèni, sak lemah pangonané, peneré ing pegunungan Efraim lan Geser sak lemah pangonané, ₂₂Kibsaim sak lemah pangonané lan Bèt-Horon sak lemah pangonané: kuta papat. ₂₃Sangka taler Dan: Elteke sak lemah pangonané, Gibeton sak lemah pangonané, ₂₄Ayalon sak lemah pangonané lan Gat-Rimon sak lemah pangonané: kuta papat. ₂₅Sangka separo taler Manasé: Taanak sak lemah pangonané lan Gat-Rimon sak lemah pangonané: kuta loro. ₂₆Gunggungé ana kuta sepuluh sak lemah pangonané kanggo turunané turahé turunané Kéhat.

₂₇Turunané Gèrson, tunggalé turunané wong Lévi, dikèki sangka separoné taler Manasé: Golan ing tanah Basan, kuta pangungsèné wong dosa awit matèni, kabèh pangonané lan Beestera sak lemah pangonané: kuta loro. ₂₈Sangka taler Isakar: Kisyon sak lemah pangonané, Dobrat sak lemah pangonané, ₂₉Yarmut sak lemah pangonané lan En-Genim sak lemah pangonané: kuta papat. ₃₀Sangka taler Asyèra: Misal sak lemah pangonané, Abdon sak lemah pangonané, ₃₁Helkat sak lemah pangonané lan Réhob sak lemah pangonané: kuta papat. ₃₂Lan sangka taler Naftali: Kèdès ing negara Galiléa, kuta pangungsèné wong dosa awit matèni, kabèh pangonané, Homor-Dor sak lemah pangonané lan Kartan sak lemah pangonané: kuta telu. ₃₃Kutané wong Gèrson miturut turunané kuwi kabèh ana telulas sak lemah pangonané.

₃₄Turunané wong Mérari, ya kuwi turahé wong Lévi, kuwi pada dikèki sangka taler Sébulon: Yoknéam sak lemah pangonané, Karta sak lemah pangonané, ₃₅Dimna sak lemah pangonané lan Nahalal sak lemah pangonané: kuta papat. ₃₆Sangka taler Rubèn: Bèzèr sak lemah pangonané, Yahas sak lemah pangonané, ₃₇Kedémot sak lemah pangonané lan Mefaat sak lemah pangonané: kuta papat. ₃₈Sangka taleré Gad: Ramot ing negara Giléad, kuta pangungsèné wong dosa awit matèni, kabèh pangonané, Mahanaim sak lemah pangonané, ₃₉Hèsbon sak lemah pangonané, Yaéser sak lemah pangonané, kabèh ana kuta papat. ₄₀Sakkèhé kuta kuwi mau dadi duwèké turunané Mérari miturut turunané, ya kuwi turahé turunané wong Lévi, pandumané dilotré kuta rolas.

₄₁Sakkèhé kutané wong turunané Lévi ing sak tengahé duwèké wong Israèl kuwi ana kuta patang puluh wolu sak lemah pangonané. ₄₂Siji-sijiné kuta ana pangonané ing sak ubengé, kutané kabèh pada kaya mengkono.

₄₃Mengkono dadiné sak kabèhé negara kuwi dikèkké GUSTI marang wong Israèl, ya kuwi negara sing wis dijanjèkké karo sumpah, yèn bakal dikèkké marang para leluhuré, ya terus kelakon direbut lan dienggoni. ₄₄Sak terusé pada dikèki tentrem ing sak ubengé karo GUSTI netepi perjanjiané sing karo sumpah marang para leluhuré. Kabèh mungsuhé ora ana siji-sijia sing bisa tetep urip ing ngarepé: Kabèh mungsuhé pada dipasrahké karo GUSTI marang ing tangané. ₄₅Samubarang sing apik, sing wis sing dijanjèkké kabèh karo GUSTI marang turunané Israèl ora ana sing ora kelakon, kabèh kelakon.