Matius 24

₁Sakwisé kuwi Yésus metu sangka Griya Sutyi lan lunga sangka kono. Para muridé terus pada teka ngomongi Panjenengané pernatan bangunan Griya Sutyi. ₂Panjenengané ngomong marang para murid: “Apa kowé pada weruh kuwi kabèh? Sak temené Aku ngomong marang kowé, ing kéné bakal ora ana watu siji waé sing tetep temumpang ing watu liyané, kabèh bakal diambrukké.”

₃Waktu Panjenengané njagong ing gunung Saitun, para muridé pada nemoni ing ngarepé Panjenengané lan ngomong: “Gusti supaya ngomong marang kita, mbésuk apa kuwi kabèh arep kedadian, lan apa tanda-tandané tekané Panjenengan lan tanda-tandané pungkasané jaman?” ₄Yésus semaur lan ngomong marang para murid: “Pada digatèkké, aja nganti ana wong sing nasarké kowé! ₅Awit okèh wong sing bakal teka nganggo jeneng-Ku lan ngomong: Aku iki Kristus, lan bakal nasarké wong okèh. ₆Kowé bakal krungu swarané perang utawa kabar-kabar bab perang. Nanging digatèkké, aja pada kagèt, awit iki kudu kelakon, nanging kuwi durung pungkasané. ₇Awit bangsa bakal nyerang nglawan bangsa, kraton nglawan kraton. Bakal ana pailan lan lindu, ing ngendi-endi panggonan. ₈Nanging kuwi kabèh mung wiwitané sangsara arep tekané jaman anyar.

₉Ing waktu kuwi kowé bakal pada dipasrahké marang panganiaya lan kowé bakal dipatèni lan kowé bakal disengiti karo sak kabèhé bangsa awit sangka jeneng-Ku. ₁₀Ing kono bakal okèh wong sing ninggal pengandelé lan pada masrahké liyané lan sengit-sengitan. ₁₁Lan menèh bakal okèh nabi palsu sing njedul lan nasarké wong pirang-pirang. ₁₂Apa menèh awit sangka mundak tukulé duraka, terus katrésnané wong okèh pada dadi luntur. ₁₃Nanging sapa sing mantep tekan pungkasan, kuwi bakal dislametké. ₁₄Lan Injilé Kraton iki bakal diwartakké ing sak lumahé jagat kanggo paseksi marang sak kabèhé bangsa. Sakwisé kuwi bakal tekané dina pungkasan.”

₁₅“Lan yèn kowé pada weruh ‘penggawé alané tukang pengrusak’ ngadek ing panggonan sutyi, sing digelarké lantaran Danièl - sapa sing matya kudu nggatèkké - ₁₆wong-wong ing Yudéa pada mblayua menyang pegunungan. ₁₇Wong sing ijik ing payon aja medun njupuk barang-barang sangka omahé. ₁₈Lan wong sing ijik ing kebon aja mulih njupuk sandangané. ₁₉Tyilaka wong sing ijik meteng lan sing ijik nusoni ing waktu kuwi. ₂₀Pada ndedongaa, supaya enggonmu pada ngungsi ora kelakon ing waktu bediding utawa ing dina sabat. ₂₁Awit ing waktu kuwi bakal ana sangsara gedé; sing durung tau kelakon wiwit wiwitané jagat nganti saiki lan uga ora bakal kelakon menèh. ₂₂Lan yèn dina-dinané sangsara kuwi ora dityepetké, sak rupané wong ora ana sing slamet; nanging awit wong-wong sing dipilih, dina-dina kuwi bakal dityepetké.

₂₃Ing waktu kuwi, yèn ana wong sing ngomong marang kowé: Delengen, Mésias ing kéné, utawa Mésias ing kana, kowé aja pada ngandel. ₂₄Awit mésias-mésias palsu lan nabi-nabi palsu bakal njedul lan pada nggawé tanda-tanda gedé lan mujijat-mujijat kanggo nasarké, yèn bisa ya kanggo para sing dipilih uga. ₂₅Aku wis ngomongké kuwi marang kowé sak durungé kelakon. ₂₆Mulané yèn ana wong ngomong marang kowé: Panjenengané ing ara-ara samun, kowé aja terus mrana; utawa: Panjenengané ing kamar ndelik, kowé aja pada ngandel. ₂₇Awit kayadéné klélap njedul sangka wétan semlorot nganti tekan kulon, ya mengkono kuwi mbésuk bakal tekané Putrané Manungsa. ₂₈Ing ngendi ana batang, ing kono manuk gagak bakal pada grombolan.”

₂₉“Sakwisé kasangsaran ing waktu kuwi, terus sak nalika srengéngé bakal dadi peteng lan mbulan bakal ora semlorot padangé lan lintang-lintang bakal pada tyeblok sangka langit, uga tyagak-tyagaké langit bakal pada gonjang-ganjing. ₃₀Ing waktu kuwi bakal kétok tandané Putrané Manungsa ing langit lan sak kabèhé bangsa ing sak lumahé bumi bakal pada ngaduh-aduh, terus pada ndeleng Putrané Manungsa teka numpak mégané langit, nganggo pangwasa lan kamulyan gedé. ₃₁Panjenengané terus bakal ngutus para mulékaté karo swarané trompèt sing banter banget lan kuwi bakal pada nglumpukké wong-wong pilihané sangka kéblat papat, sangka pinggiré langit tekan pinggir sisihé.

₃₂Pada blajara sangka wit anjir, sing ngéné: Yèn pangé memes lan wiwit semi, kowé pada ngerti, yèn wis mèh waktu panas. ₃₃Semono uga, yèn kowé pada weruh lelakon kuwi mau kabèh, pada ngertènana, yèn wis tyedak, wis ing ngarep lawang. ₃₄Sak temené Aku ngomong marang kowé, golongan iki ora bakal entèk, nganti kuwi mau kabèh kelakon. ₃₅Langit lan bumi bakal entèk, nanging tembung-tembung-Ku ora bakal entèk babar pisan. ₃₆Mung waé, kanggo dina lan wantyiné kuwi, ora ana wong siji-sijia sing mengertèni, dadia para mulékat ing swarga ora, mengkono uga Putra, ya ora, kejaba mung Bapak déwé.”

₃₇“Awit kayadéné waktu jamané Noah, ya mengkono uga bakalé tekané Putrané Manungsa. ₃₈Awit pada kaya ndèk jaman sak durungé banjir bandang, wong-wong pada mangan lan ngombé, omah-omah lan ngomah-omahké, nganti dina enggoné Noah mlebu ing kapal, ₃₉lan pada ora nglegéwa nganti tekané banjir sing ngentèkké wong-wong mau kabèh, mengkono uga mbésuk ing dina tekané Putrané Manungsa. ₄₀Ing waktu kuwi bakal ana wong loro ing kebon, sing siji bakal diangkat, sijiné bakal ditinggal. ₄₁Bakal ana wong wadon loro sing pada nggiling nganggo watu gilingan, siji bakal diangkat sijiné ditinggal. ₄₂Mulané pada jaga-jagaa, awit kowé ora ngerti ing dina apa Gustimu bakal teka.

₄₃Nanging iki ngertènana: Yèn sing nduwé omah ing wayah mbengi ngerti wantyiné tekané maling, mesti terus jaga-jaga, ora bakal pada olèh omahé dibobol. ₄₄Awit sangka kuwi, kowé uga pada jaga-jagaa, awit Putrané Manungsa kuwi teka ing wayah sing ora kok sangka.”

₄₅“Sapa abdi sing setia lan wityaksana, sing dipilih karo bendarané mimpin para abdiné, dipasrahi nyepaki pangan marang para abdiné ing waktu sing ditemtokké? ₄₆Rahayu abdi sing waktu bendarané teka, ketemu nindakké mengkono. ₄₇Sak temené Aku ngomong marang kowé, bendara kuwi bakal netepaké abdi mau ngwasani sembarang duwèké kabèh. ₄₈Nanging yèn abdi kuwi ala lan nggagas ing sak njeruhné atiné, ngéné: ₄₉Bendaraku ora teka-teka, terus wiwit nyabeti kantya-kantyané pada-pada abdiné lan mangan ngombé bebarengan karo wong-wong sing seneng mendem, ₅₀bendarané abdi kuwi mau terus teka ing dina sing ora disangka-sangka lan ing wantyi sing ora ngerti. ₅₁Abdi mau bakal dipatèni lan diukum pada karo para wong lamis. Ing kono bakal ana tangis lan keroté untu.”