Masmur 68

₂Gusti Allah ngadek, mungsuhé pada buyar,

wong sing pada sengit marang Panjenengané mblayu sangka ngarepé.

₃Pada kaya kebul kabur entèk,

kaya lilin terus ing ngarepé geni,

mengkono entèkké wong duraka ing ngarepé Gusti Allah.

₄Nanging para wong bener pada bungah-bungah,

pada bungah-bungah ing ngarepé Gusti Allah,

pada seneng lan bungah-bungah.

₅Pada ngidunga kanggo Gusti Allah, asmané luhurna karo masmur,

nggawéa dalan kanggo Panjenengané, sing nganggo tumpakané sing ngliwati mendung!

Asmané ya kuwi GUSTI, bungah-bungaha ing ngarepé!

₆Bapaké para botyah lola lan pengayomané para randa,

kuwi Gusti Allah ing kratoné sing sutyi;

₇wong sing ditinggal sanak sedulur pada dikèki panggonan,

wong tawanan pada diluwari, nganti pada rumangsa beja,

nanging wong mbruntak pada manggon ing lemah gundul.

₈Duh Gusti Allah, waktu Panjenengan maju perang ing ngarepé umat Panjenengan,

waktu Panjenengan lunga mlaku ing ara-ara samun, Sela

₉bumi gonjang-ganjing, malah langit ngedunké udan ing ngarepé Gusti Allah;

gunung Sinai hoyak ing ngarepé Gusti Allah, Gusti Allahé Israèl.

₁₀Duh Gusti Allah, Panjenengan ngesokké udan karo murah;

lemah duwèk Panjenengan sing garing Panjenengan pulihké,

₁₁nganti kumpulané kéwan-kéwan Panjenengan terus pada olèh panggonan ing kono;

duh Gusti Allah, awit sangka kawelasan Panjenengan,

Panjenengan nyukupi kebutuhané wong sing ditindes.

₁₂Gusti ngekèki tembungé;

wong sing pada nggawa kabar apik kuwi dadi suradadu sing gedé.

₁₃Para ratuné suradadu kabèh pada keplayu,

para wong wadon sing nunggu omah pada ngedum-edum rayahané.

₁₄Kowé apa pada gelem lèyèh-lèyèh ing antarané kandang-kandang?

Swiwiné manuk dara pada dilapis slaka,

lan wuluné dilapis karo emas sing semlorot.

₁₅Waktu sing Mahakwasa mbuyarké para ratu ing kono,

gunung Salmon terus kudanan karo salju.

₁₆Gunung Basan kuwi gunung duwèké Gusti Allah,

gunung Basan kuwi gunung sing putyuké okèh!

₁₇Hé gunung-gunung sing putyuké okèh, kenèng apa kowé pada serik mléroki gunung sing dikarepké karo Gusti Allah dadi griyané?

GUSTI bakal manggon ing kono selawasé.

₁₈Krétané Gusti Allah kuwi puluhan èwu,

malah éwon-éwon tyatyahé,

Gusti wis mlaku sangka gunung Sinai mlebu ing panggonan sutyi.

₁₉Panjenengan wis munggah menyang griya Panjenengan, ngrampasi para wong tawanan;

Panjenengan nampani pisungsung sangka para manungsa,

malah uga sangka para wong sing pada nglawan

supaya pada manggon ing kono, duh GUSTI, Gusti Allah.

₂₀Pinujia Gusti!

Sedina-dina Panjenengané nanggung urip kita.

Gusti Allah kuwi keslametan kita. Sela

₂₁Gusti Allah kuwi kanggo kita Gusti Allah sing ngekèki keslametan,

Gusti Allah, Gustiku kuwi ngluwari kita sangka pati.

₂₂Gusti Allah ngremuk sirahé mungsuhé,

sirahé wong sing okèh rambuté, sing mblarah ing sak njeruhné kesalahané.

₂₃Préntahé Gusti mengkéné: “Bakal Tak balèkké sangka Basan,

bakal Tak gawa bali sangka segara sing jeru,

₂₄supaya kowé ngisuhi sikilmu karo getih,

lan ilaté asu-asumu uga pada olèh panduman sangka mungsuhmu.”

₂₅Duh Gusti Allah, wong pada weruh mlaku Panjenengan nganggo arak-arakan,

arak-arakané Gusti Allah kita, Ratu kita ing panggonan sutyi.

₂₆Wong sing menyanyi mlaku ing ngarep,

ing mburiné para sing pada ngunèkné siter,

ing tengah para prawan sing pada nabuhi ketyer.

₂₇“Pada ngluhurna Gusti Allah bales-balesan,

ya kuwi GUSTI, hé kowé sing asal-usulé pada sangka turuné Israèl!”

₂₈Kaé Bényamin, sing ragil, sing mlaku ing ngarep déwé,

para penggedéné Yéhuda pada gembruduk,

para penggedéné Sébulon, para penggedéné Naftali.

₂₉Duh Gusti Allah, Panjenengan supaya gelem nglumpukké kekuwatan Panjenengan,

duh Gusti Allah, Panjenengan supaya gelem ngétokké pangwasa Panjenengan,

Panjenengan sing wis nyambutgawé kanggo kita.

₃₀Para ratu pada masrahké pisungsung marang Panjenengan,

awit sangka griya Panjenengan ing Yérusalèm.

₃₁Panjenengan supaya gelem nyenèni kewan ing glagahan,

golongané sapi lanang lan pedèt,

lan wong sing pada seneng marang slaka, supaya Panjenengan iles-iles,

sing pada seneng perang, supaya Panjenengan buyaraké!

₃₂Wong pada nggawa barang tembaga sangka Egipte,

wong Etiopia gelis-gelis pada megarké tangané ing ngarepé Gusti Allah.

₃₃Hé kabèh kraton ing sak lumahé bumi, pada ngidunga kanggo Gusti Allah,

pada ngidunga masmur kanggo Gusti; Sela

₃₄kanggo Panjenengané sing numpak kréta ing langit kawit mbiyèn mula.

Pada gatèkna, Panjenengané ngetokké swarané,

swarané sing ngidap-idapi!

₃₅Pada ngakonana pangwasané Gusti Allah;

kaluhurané ngayomi Israèl, pangwasané ing mendung-mendung.

₃₆Gusti Allah kuwi ngidap-idapi ing griyané sing sutyi,

Gusti Allahé Israèl, Panjenengané ndadèkké pangwasa lan kekuwatan marang umaté.

Pinujia Gusti Allah!