Salomo drai en baka gi MASRA
1Boiti a umapikin fu farao, kownu Salomo ben lobi furu tra uma tu fu difrenti dorosei kondre. Uma fu Moab, fu Amon, fu Edom nanga uma fu den Hetitisma. 2Den ben de fu den folku fu san MASRA ben taigi den Israelitisma taki: “Un no mus trow nanga den umasma fu den èn den no mus trow nanga den umasma fu unu. Bika den o drai un ede fu un dini den gado fu den.” Ma na den uma dati Salomo ben lobi. 3A ben trow nanga seibi hondro uma èn a ben e libi nanga dri hondro trawan ete èn den uma dati drai en ede. 4Salomo ben de wan owru man kba di den uma fu en meki a bigin dini tra gado. A no teki a eksempre fu en p'pa David, fu dini MASRA, a Gado fu en, wawan. 5A go dini Astarte, a gado fu den Sidonisisma, nanga Milkom, a groskin gado fu den Amonitisma. 6A ben e du sani di no ben bun srefsrefi ini MASRA ai, èn a no ben e dini MASRA moro nanga en heri ati, leki en p'pa David. 7Dan Salomo meki den bow wan altari gi Kemos, a groskin gado fu Moab, tapu a bergi na oostsei fu Yerusalem, nanga wan gi Molok, a groskin gado fu Amon. 8A du a srefi sani tu gi ala den uma fu en fu den doroseikondre, di ben e bron wierook èn den ben e srakti meti leki ofrandi gi den gado fu den.
9A sani disi meki MASRA ati bron tapu Salomo, fu di Salomo ben drai en baka gi MASRA, a Gado fu Israel, di ben sori Ensrefi tu leisi na en. 10A ben taigi Salomo fu no waka baka tra gado, ma Salomo no ben arki san MASRA ben komanderi en. 11Fu dat'ede MASRA taigi en taki: “Fu di a kon so now, taki yu broko a ferbontu nanga Mi èn yu no hori yusrefi na den sani di yu ben mus tan du soleki fa Mi ben komanderi yu, Mi sa puru a kondre na yu anu èn gi en na wan knekti fu yu. 12Ma fu yu p'pa David ede, meki Mi o du dati te yu dede fosi. Mi o puru a kondre na yu manpikin anu. 13Ma Mi no sa puru a heri kondre na en anu. Mi sa libi wan fu den lo gi en fu Mi knekti David ede nanga fu Yerusalem ede, di Mi teki.”
Den feyanti fu Salomo
14Dan MASRA meki Hadad fu Edom tron a feyanti fu Salomo. A man disi ben de famiri fu a kownu fu Edom. 15Baka wan feti fu David nanga Edom, Yoab, a edeman fu a legre, ben go fu beri den srudati di ben dede ini a feti. Dan Yoab kiri ala den mansma ini Edom. 16Yoab ben tan siksi mun nanga a legre fu Israel ini Edom, te leki den ben kiri ala den mansma ini Edom. 17Ma Hadad, di ben yongu ete a ten dati, ben man lowe nanga wantu tra man fu Edom go na Egipte. Den man dati ben de heihei wrokoman fu en p'pa. 18Den psa ini Midyan dan den kon doro na Paran. Drape den teki wantu man moro nanga den, dan den hari go moro fara na Egipte. Drape Farao, a kownu fu Egipte, gi en wan oso fu tan, a pramisi Hadad taki a o sorgu taki a abi nyanyan èn a gi en wan pisi gron. 19Farao ben kon lobi Hadad sote tak' a meki a trow nanga a sisa fu en eigi frow, kownu Takpenes. 20A frow fu Hadad kisi wan boi gi en di den kari Genubat. A frow fu farao teki a boi dati kweki ini Farao oso èn a gro makandra nanga den boi fu farao. 21Ma di Hadad kisi fu yere taki David nanga Yoab, a edeman fu a legre fu David, dede, a aksi farao taki: “Mi e begi yu fu drai go baka na mi kondre.” 22Ne Farao aksi en taki: “Yu e mankeri wan sani na mi taki wantron so yu wani go baka na yu kondre?” Hadad piki farao taki: “Kwet'kweti, ma mi e begi yu fu yu meki mi go.”
23Gado ben meki Salomo kisi ete wan feyanti. Dati ben de Reson, a manpikin fu Elyada. Reson ben lowe fu en basi, kownu Hadadeser fu Soba, 24di David ben kiri Hadadeser nanga a legre fu en ini wan feti. Reson ben feni wantu man di ben e waka na en baka. Den go tan na Damaskus, den teki drape leki den tanpresi èn den ben e libi leki kownu. 25Reson ben de wan feyanti fu Israel solanga di Salomo ben de na libi. Boiti Hadad, Reson srefi ben e gi Israel bigi problema, bika a no ben wani sabi not'noti fu Israel èn A ben tron kownu fu Aram.
26Wan tra sma di ben tron wan feyanti fu Salomo tu, ben de Yerobeam, wan knekti fu en fu Sereda, wan presi ini Efraim. En p'pa, di no ben de na libi moro, ben nen Nebat èn en m'ma ben nen Serua. 27Na so a dyugudyugu fu en nanga Salomo bigin. Salomo ben e meki a Millo fu tapu wan bigi olo na a skotu fu a foto fu David. 28Yerobeam ben de wan bun wrokoman. Di Salomo si taki a ben de wan tranga wrokoman, a poti en leki edeman fu luku den wrokoman fu a lo fu Yosef. 29Wan dei di Yerobeam ben kmoto na Yerusalem, a miti nanga a profeiti Akia fu Silo, dorosei fu a foto. Akia ben weri wan nyun langa dyakti. 30Den tu man disi wawan ben de ini a opo wei. Ne Akia teki a nyun langa dyakti fu en dan a priti en ini twarfu pisi. 31Dan a taigi Yerobeam taki: “Teki tin pisi, bika MASRA, a Gado fu Israel, e taigi yu taki: Luku, Mi o puru a kondre na Salomo anu èn Mi o gi yu tin fu den lo. 32Ma Mi o libi wan lo gi en. Mi o du dati fu Mi knekti David ede èn fu Yerusalem, a foto di Mi teki na mindri fu ala den lo fu Israel. 33Mi e tyari a prati disi fu di a kownu nanga a folku gwe libi mi. Den go boigi gi Astarte, a gado fu den Sidonisisma, gi Kemos, a gado fu Moab, nanga gi Milkom, a gado fu Amon. Den no libi leki fa Mi wani, èn den no du san Mi ben wani. Den no teki a eksempre fu David, a p'pa fu Salomo fu du den sani di den ben mus tan du èn fu hori densrefi na den sani na san den ben mus tan hori densrefi. 34Ma Mi no sa puru a heri kondre na Salomo anu. Mi sa meki a tan kownu solanga leki a de na libi. Mi o du dati fu Mi knekti David ede, di Mi ben teki èn a ben hori ensrefi na den gebod fu Mi nanga den sani na san a ben mus tan hori ensrefi. 35Mi sa puru a kondre na Salomo en manpikin anu. Mi o gi yu tin fu den lo. 36Mi o meki a manpikin fu en hori wan. Bika Mi wani taki wan bakapikin fu Mi knekti David sa tan kownu ini Yerusalem, a foto di Mi teki leki a presi pe sma kan anbegi Mi. 37Mi sa meki yu tron kownu fu Israel èn yu sa de kownu fu a heri kontren di yu wani. 38Du ala san Mi e komanderi yu, libi leki fa Mi wani èn du san bun ini Mi ai. Hori yusrefi na den sani na san yu mus hori yusrefi nanga den gebod fu Mi, soleki fa Mi knekti David ben du. Dan Mi sa yepi yu èn sorgu taki na soso den pikin nanga bakapikin fu yu sa tan kownu, neleki fa Mi du nanga David, èn Mi sa gi yu Israel. 39Mi sa broko den bakapikin fu Israel saka fu den sondu di den du, ma no fu ala ten.”
40Salomo suku fu kiri Yerobeam, ma Yerobeam lowe go na Sisak, a kownu fu Egipte. A tan drape te leki Salomo dede.
41Den tra sani di psa ini a libi fu Salomo, ala den sani di a du, a koni di a ben abi, skrifi poti ini a buku fu a historia fu Salomo. 42Ini Yerusalem, Salomo tiri heri Israel fotenti yari langa. 43A dede èn den beri en ini a foto fu en p'pa David. En manpikin Rekabeam teki en presi leki kownu.
