Gado e sori ensrefi baka na Salomo
1Di Salomo ben kba bow a oso fu MASRA, a kownu-oso nanga ala den tra sani di a ben wani bow, 2MASRA sori ensrefi fu a di fu tu leisi na en ini wan dren, neleki fa A ben sori ensrefi na en na Gibeon. 3MASRA taigi en taki: “Mi yere a begi nanga a dyeme fu yu. Mi poti a oso di yu bow gi Mi leki wan santa presi pe sma kan anbegi Mi fu têgo. Mi ai sa de na en tapu èn Mi sa kibri en fu têgo. 4Efu yu dini Mi tapu wan tru fasi èn nanga wan krin ati leki yu p'pa David èn yu du ala sani san Mi komanderi yu fu du, efu yu du den sani di yu mus tan du èn yu hori yusrefi na den sani na san yu mus tan hori yusrefi, 5dan Mi sa meki tak' na soso den pikin nanga den bakapikin fu yu sa de kownu fu Israel. Mi ben pramisi yu p'pa David taki na den pikin nanga bakapikin fu en ben o sidon tapu a kownusturu fu Israel. 6Ma efu yu, den pikin nanga bakapikin fu yu sa drai baka gi Mi, èn efu un no hori unsrefi na den gebod nanga den sani di un mus tan du èn un go dini tra gado èn boigi gi den, 7dan Mi sa puru a pipel fu Israel nanga tranga fu a kondre di Mi gi den. Mi sa puru a oso na Mi tapu di Mi ben poti fu sma kan anbegi Mi. Ala den tra folku sa koti odo gi Israel èn teki en leki spot'popki. 8A oso sa broko fadon na gron, noti fu en no o tan abra. Ala den sma di o waka psa o tnapu nanga opo mofo èn den o skreki fu si san psa. Den o aksi fu sanede MASRA du so nanga a kondre èn nanga a oso disi. 9Dan sma sa piki den taki: Na fu di den gwe libi MASRA, a Gado fu den, di ben puru den afo fu den na Egipte. Den go poti den fertrow na tapu tra gado èn den go anbegi èn dini den. Na dat' meki MASRA meki a bigi ogri disi miti den.”
Tra sani di kownu Salomo du
10Tutenti yari Salomo ben abi fanowdu fu meki a oso fu MASRA nanga a kownu-oso. 11Hiram, a kownu fu Tirus ben gi Salomo sedre-udu, sipres-udu nanga gowtu, someni leki a ben wani. Di Salomo kba bow, a gi Hiram tutenti foto ini Galilea. 12Ma di Hiram kmoto fu Tyrus kon fu luku den foto, a no ben breiti nanga den. 13A taigi Salomo taki: “Mi mati, san na den foto disi gi yu gi mi?” Na fu dat'ede meki den e kari a kontren dati Kabul te leki a dei fu tide. 14Hiram ben gi Salomo sowan fo nanga afu dusun kilo gowtu.
15Kownu Salomo ben seni teki man di ben mus wroko fu soso gi en. Den man disi ben meki oso fu MASRA, a oso fu kownu, a Millo, a skotu fu Yerusalem, Hasor, Megido nanga Geser. 16Farao, a kownu fu Egipte, ben hari kon feti nanga Geser èn a ben teki a foto abra. A bron a foto èn a kiri den Kananitisma di ben e libi drape. Di en umapikin trow nanga Salomo, a gi en umapikin a foto dati leki kado. 17Salomo ben bow Geser baka. A meki a foto Lagi-Bet-Horon kon moro tranga tu nanga den foto 18Baalat nanga Tamar ini a dreisabana. 19A meki foto tu fu kibri nyanyan poti nanga foto fu poti den wagi nanga den asi fu en. Salomo bow ala san a ben wani na ini Yerusalem, tapu a Libanon noso awinsi pe fu a kondre fu en. 20Fu den folku di no ben de Israelitisma: den Amoritisma, den Hetitisma, den Perisitisma, den Hiwitisma nanga den Yebusitisma, 21ala den bakapikin fu den, di den Israelitisma no ben kiri, Salomo ben poti fu wroko fu soso leki srafu gi en te leki a dei fu tide. 22Ma Salomo no meki no wan Israelitisma wroko leki srafu gi en. Den ben de srudati, wrokoman fu kownu, man di ben e yepi en tiri a kondre, edeman fu den srudati, edeman fu den fetiwagi fu kownu nanga edeman fu den man di ben e tyari den asi fu kownu. 23Salomo ben abi feifi hondro nanga feifitenti hei edeman tu di ben mus tiri den wrokoman fu en.
24Fa a umapikin fu farao froisi fu a foto fu David go na a oso di Salomo bow gi en, na so Salomo bigin bow a Millo.
25Dri leisi wan yari Salomo ben e bron meti leki ofrandi gi MASRA èn a ben e tyari freide-ofrandi tapu a altari di a meki gi En. A ben e bron wierook tu na MASRA fesi.
26Kownu Salomo ben meki den meki sipi gi en na Esyon-Geber, wan presi na Elat, na a syoro fu a Riet Se. 27Hiram ben seni knekti fu en, man di ben sabi a se bun, fu yepi den man fu Salomo tapu den sipi. 28Den sipi ben go na Ofir èn fu drape den tyari sowan tin-na-fo dusun kilo gowtu kon gi Salomo.
