Kownu Usia fu Yuda
1Usia ben abi tin-na-siksi yari, di a heri pipel fu Yuda teki en poti leki kownu na a presi fu en papa Amasya. 2Baka di en p'pa dede, a meki a foto Elat kon moro tranga èn tyari en kon baka ondro a tiri fu Yuda. 3Usia ben abi tin-na-siksi yari di a tron kownu. A tan feifitenti-na-tu yari na makti ini Yerusalem. Èn m'ma ben nen Yekolya èn a ben de fu Yerusalem. 4A ben e du san bun ini MASRA ai, neleki en p'pa Amasya. 5A ben e suku Gado, solanga Sekarya, di ben e leri en fu lespeki Gado, ben de na libi. Solanga leki a ben e suku MASRA, Gado ben e meki sani waka bun gi en.
6Usia ben hari go feti nanga den Filistijnsma. A broko a skotu fu den foto Gat, Yabne nanga Asdod. A bow tranga foto tu ini a kontren fu Asdod nanga tra presi ini a kondre fu den Filistijnsma. 7Gado yepi en di a ben e feti nanga den Filistijnsma, nanga den Arabiri fu Gur-Baal nanga di a ben e feti nanga den Mehunitisma. 8Den Amonitisma ben e tyari sani gi Usia di a ben ferplekti den fu tyari kon. Te na ini Egipte den ben e yere fu en, bika a makti fu en ben kon bigi srefsrefi.
9Usia bow tranga toren ini Yerusalem na a Ukupoort, a Dalpoort nanga a Uku. 10A bow toren tu ini a dreisabana èn a diki furu peti ini a kontren na den bergifutu nanga a hei kontren, fu di a ben abi furu meti. A ben abi furu man tu di ben e wroko gron gi en nanga man di ben e prani droifibon fu meki win tapu den bergi nanga na presi pe a gron fatu, fu di a ben lobi prani.
11Usia ben abi wan legre tu nanga srudati di ben de klar'klari fu go na feti. Den ben prati na ini grupu leki fa sekretarsi Yehiyel nanga ofisiri Maaseya ben skrifi den poti. Den tu man disi ben de ondro a tiri fu Hananya, wan heihei wrokoman fu kownu. 12Den edeman fu den famiri di ben e teki prati na ini a legre ben de tu dusun siksi hondro. 13Den ben de edeman fu wan legre fu dri hondro seibi dusun nanga feifi hondro fetiman di ben de klar'klari fu feti, fu yepi kownu nanga den feyanti fu en. 14Usia ben sorgu tak' a heri legre ben abi schild, lansri, fet'ati, isri dyakti, bo nanga ston fu fringi. 15Ini Yerusalem a meki den poti fetisani, di koniman ben meki, tapu den toren nanga den uku fu a skotu fu a foto, di ben man sutu peiri nanga bigi ston. Alasei den ben e taki fu Usia, bika Gado ben e yepi en tapu wan ferwondru fasi te leki a tron wan man nanga makti.
16Ma di Usia tron wan man nanga makti, a kisi so wan heimemre di ben o tyari dede gi en, fu di a no hori ensrefi na den sani fu MASRA, a Gado fu en, ma a go ini a tempel fu MASRA fu go bron wierook tapu a altari pe wierook e bron. 17Ma granpriester Asarya waka go na kownu Usia baka, makandra nanga aititenti priester fu MASRA, di ben abi dek'ati. 18Den tapu pasi gi kownu Usia dan den taigi en taki: “Usia, a no yu wroko fu bron wierook gi MASRA, ma na a wroko fu den priester, den bakapikin fu Aaron, di Gado poti aparti fu bron wierook. Kmoto ini a santa presi, bika yu hori yu na den sani fu Gado. MASRA Gado no o prisiri nanga a sani di yu du.” 19Ne Usia atibron. A pan nanga a switismeri di a ben o bron ben de ini en anu. A ben e meki trobi nanga den priester di wantronso gwasi broko na en fes'ede, leti fesi den priester, ini a oso fu MASRA, na a altari fu bron wierook. 20Di granpriester Asarya nanga den tra priester luku en bun, den si tak' gwasi ben broko na en fes'ede. Ne den yagi en wantron puru drape. Ensrefi ben lon gwe es'esi, bika MASRA ben naki en nanga a siki dati. 21Kownu Usia tan gwasi te leki a dede. A libi leki wan gwasi man ini wan aparti oso èn tapu a dyari fu a oso fu MASRA a no ben kan go srefsrefi. En manpikin Yotam ben e sorgu taki sani ben e waka bun ini a kownu-oso èn a ben e tiri a kondre.
22A profeiti Yesaya, a manpikin fu Amos, skrifi den tra sani di psa ini a libi fu Usia, fu a bigin go te na a kba. 23Di Usia dede, den beri en pe den afo fu en beri. Ma den beri en ini a wei sei a berpe fu den kownu, fu di a ben gwasi. En manpikin Yotam teki en presi leki kownu.