A sabat yari
1Ibri seibi yari un sa taigi a sma di mus pai unu taki a no abi fu pai un baka. 2Tapu a fasi disi un mus du en: Ibri sma di ben leni wan trawan moni sa taigi a sma di a ben leni a moni taki a no abi fu pai en baka. A no sa dwengi wan sma fu Israel leki ensrefi fu pai en baka. Bika na ini a nen fu MASRA den sma no abi fu pai baka. 3Wan doroseisma yu kan dwengi fu a pai yu baka. Ma efu na wan sma fu Israel leki unsrefi, dan yu sa taigi en taki a no abi fu pai yu baka. 4Pôtisma no sa de na un mindri bika MASRA sa blesi unu ini a kondre di MASRA, un Gado, sa gi unu taki na fu unu. 5A sa du dati efu un arki bun san MASRA, un Gado, e taigi unu fu hori unsrefi bun na a heri gebod di mi e leri un tide. 6Te MASRA, un Gado, blesi unu leki fa A pramisi, un o man leni furu tra folku, ma unsrefi no leni noti. Un o abi makti abra furu tra folku, ma sma no o abi makti na un tapu.
7Efu ini a kondre di MASRA, un Gado, sa gi unu wan pôtisma, wan sma fu Israel leki unsrefi, de na un mindri ini a foto pe un e libi, un no sa tranga un ati èn gridi en wan sani. 8Un sa gi en bogobogo èn nofo, someni leki a abi fanowdu. 9Un mus luku bun taki un no du a lagi sani disi fu no leni wan poti sma wan sani fu di un sabi taki a di fu seibi yari e kon, a yari pe un mus taigi den sma taki den no abi fu pai un baka. Tapu a fasi disi un no e sori sari-ati èn un e sondu, efu a sma kragi na MASRA fu yu. 10Un sa gi en nofo èn un ati no sa hati unu te un gi en. Bika MASRA, un Gado, sa blesi un fu dati ini ala sani di un du nanga san un wani du. 11Pôtisma o de nomo na un mindri. Fu dat'ede mi e taigi un taki un mus gi bogobogo na a sma fu Israel leki unsrefi, na a mofinawan nanga a pôtiwan ini un kondre.
12Efu wan sma fu Israel, wan Hebrewman noso wan Hebrew-uma, leki unsrefi seri ensrefi gi unu, a sa wroko siksi yari. Ini a di fu seibi yari un mus libi en fu a go fri fu en. 13Te un libi en fu a go fri fu en, un no sa meki a gwe nanga leigi anu. 14Un sa gi en nofo skapu nanga krabita nanga karu nanga win. Un sa gi en fu den sani nanga san MASRA, un Gado, blesi unu. 15Un mus memre taki un ben de srafu na ini Egipte èn taki na MASRA, un Gado, poti un fri. Na fu dat'ede mi e gi un a gebod disi. 16Ma efu a taigi unu taki a no wan gwe libi unu, fu di a lobi yu nanga den ososma fu yu èn fu di a abi en bun na unu, 17dan un sa teki wan fini sani dan un boro en yesi nanga en fasi na a doro. Tapu a fasi disi a sa de un srafu fu têgo. A srefi sani un sa du nanga a umasrafu fu unu. 18Un no mus tranga gi unu efu un mus libi en fu a go fri fu en. Bika siksi yari langa a wroko gi unu gi afu fu a moni di un bo pai wan wrokoman. Efu un du so, dan MASRA, un Gado, sa blesi unu ini ala sani san un e du.
19Te den kaw, den skapu nanga den krabita fu unu meki pikin, un sa poti ala fosi manwan aparti gi MASRA, un Gado. Un no mus meki sowan fosi pikin du wroko gi unu. Un no sa koti a wiwiri tu fu a fosi pikin fu a skapu. 20Un nanga den ososma fu unu sa nyan den meti disi ala yari na fesi fu MASRA, un Gado, na a presi di MASRA sa sori unu. 21Efu wan sani e du a meti, efu a malengri, breni noso efu wan tra sani e du en, dan un no sa srakti en gi MASRA, un Gado. 22Un sa nyan sowan meti na ini a foto pe un e tan. Un sa nyan en leki fa sma di krin noso sma di no krin bo nyan a meti fu wan dia. 23Soso a brudu fu en un no sa nyan. Un sa kanti a brudu trowe na gron leki fa un bo kanti watra trowe.
