Lees verschillende vertalingenLees verschillende vertalingen
Vergelijk verschillende vertalingenVergelijk verschillende vertalingen
Maak uw notitiesMaak uw notities
Kopieer en markeer BijbeltekstenKopieer en markeer Bijbelteksten
Uitproberen
Esekiyel 13
1MASRA taki nanga mi, A taigi mi taki: 2“Manpikin fu libisma, taigi den profeiti fu Israel san Mi e gi yu fu taki, den profeiti di e taki nomo san e kon ini den ede. Taigi den taki: ‘Un arki a boskopu fu MASRA. 3Na disi Masra MASRA e taki: A kba gi den don profeiti di e taki san den eigi prakseri e gi den fu taki, sondro fu den si wan sani. 4Israel, den profeiti fu yu de leki krab'dagu di e libi na broko pranasi. 5Den no warskow den sma fu Israel èn den no kibri den fu den man tan tnapu ini a feti tapu a dei fu MASRA. 6Den e bedrigi den sma nanga den sani di den e si ma di no tru èn den sani di den taki tak' o psa, no de fu fertrow. Den e taki: Na disi MASRA e taki, sondro fu Mi seni den. Dan den e wakti owktu fu den sani kon tru.
7Ma na bedrigi un e bedrigi den sma nanga den sani di un si ma di no tru èn den sani di un taki tak' o psa, no de fu fertrow. Bika un e taki: na so MASRA taki, ma Mi no taigi un noti. 8Dat' meki na so Masra MASRA e taki: yere, fu di un taki sani di no tru èn fu di un si sani di no de fu fertrow, dat' meki Mi o strafu unu. Na dati Masra MASRA taki.
9Mi o strafu den profeiti di e bedrigi den sma nanga den sani di den e si ma di no tru èn den sani di den taki tak' o psa, no de fu fertrow. Den no sa de moro na mindri a pipel fu Mi, den nen fu den no sa skrifi tu ini a buku fu den sma fu Israel, èn kon srefi den no o kon ini Israel. Dan un o ferstan dati Mi na Masra MASRA. 10Iya, Mi o du dati fu di den profeiti e kori Mi pipel fu taigi den taki: Ala sani e go bun! Ma sani no e go bun srefsrefi. Te a pipel bow wan skotu, den profeiti ben e lobi karki gi en. 11Taigi den di e lobi a karki, taki: A o fadon nomonomo. Wan sibibusi o lon psa, tranga pis'pisi ijs o fadon, èn wan tranga winti o opo. 12Te a skotu fadon sma o aksi un taki: Fu sanede a karki di un lobi gi en no hori en tnapu? 13Dat' meki na disi Masra MASRA e taki: Ini a hebi atibron fu Mi, Mi o meki wan tranga winti opo èn wan sibibusi fadon. Ini a faya atibron fu Mi di e pori ala sani, Mi o meki tranga pis'pisi ijs fadon. 14Mi o broko a skotu di un ferfi weti trowe na gron, èn den fundamenti fu en o kon fu si. A foto o tron bigi ipi broko ston èn un o dede na den ondro. Dan un o sabi dati Mi de MASRA. 15Na so Mi o lusu ala a hebi atibron fu Mi tapu a skotu, nanga tapu den wan di ferfi en weti, èn Mi o taigi den taki: A kba gi a skotu, èn a kba gi den di ferfi en: 16dati na den profeiti fu Israel di ben taki nanga Yerusalem leki na Mi ben gi den sani fu taki èn di ben si sani fu freide aladi freide no ben de. Na so MASRA e taki.’
17Manpikin fu libisma, luku den umasma fu a pipel fu yu, den di e taki leki na Mi e gi den sani fu taki. Yu taigi den now san Mi e gi yu fu taki. 18Taigi den taki: ‘Na disi Masra MASRA e taki: A kba gi den uma di e tai tofru banti lontu a anu fu ibri sma, nanga di e tapu a fesi fu pikinwan nanga bigiwan nanga krosi nanga a prakseri fu fanga a libi fu den. Un no abi fu prakseri dati un o man fanga a libi fu a pipel fu Mi dan unsrefi tan na libi. 19Un e pori Mi nanga a pipel fu Mi gi wantu anu groto nanga wantu pisi brede. Un e lei fesi krutu fu den kan kiri den wan di no du noti èn fu den kan fri den wan di du ogri. 20Dat' meki, na disi Masra MASRA e taki: Yere, Mi e hari den tofru banti koti nanga san un e fanga den sma leki pikin fowru. Mi e hari den koti fu un anu èn Mi e fri a libi fu den sma di un fanga leki fowru. 21Mi o priti den krosi fu unu di un poti tapu a fesi fu den èn Mi o ferlusu den puru ini un anu. Den no o de sma moro di un man fanga. Dan un o sabi dati Mi de MASRA. 22Nanga den lei fu unu, unu furu den sma di e libi bun ini Gado ai nanga sari, A no Mi ben meki den e sari so. Un e hori baka gi ogri-ati sma tu, èn so den no e tapu nanga a ogri di den e du fu den kan tan na libi. 23Dat' meki Mi e tyari wan kba kon na den sani di un e si èn nanga san un e bedrigi den sma, sosrefi nanga den sani di un e taigi den dati de fu kon. Mi o ferlusu a pipel fu Mi puru ini un makti. Dan un o sabi dati Mi de MASRA.’ ”