Yakob e doro baka na Betel
1Dan Gado taigi Yakob taki: “Opo, go tan na Betel, dan yu e meki wan altari drape gi a Gado di ben sori ensrefi na yu di yu ben e lowe gi yu brada Esau.” 2Ne Yakob taigi den ososma fu en nanga ala den knekti nanga srafu fu en taki: “Un poti ala den gado fu tra folku na wan sei. Un krin unsrefi èn un weri tra krosi. 3Kon meki wi opo fu go na Betel. Drape mi sa meki wan altari gi a Gado di ben piki mi di mi ben de ini bigi benawtu èn di ben kibri mi tapu a pasi di mi ben go.” 4So den gi Yakob ala den popki di den ben abi fu tra gado nanga yesilinga di den ben e weri. Dan Yakob beri den ondro a bigi bon na Sikem. 5Di den e kmoto fu drape, Gado meki sowan frede kon tapu den sma fu den foto ini a birti, taki den no hari go na baka den boi fu Yakob.
6Dan so Yakob kon doro na a foto Lus, di den e kari Betel tu, ini Kanaan. A doro nanga ala den sma di ben de na en. 7Drape a meki wan altari, dan a kari a presi: El-Betel, bika na drape Gado ben sori ensrefi na en, di a ben e lowe gi en brada. 8Di Debora dede, den beri en ondro wan bigi bon na zuidsei fu Betel dan den kari a bon: A bon fu watra-ai. Debora ben de a uma di ben sorgu Rebeka di a ben pikin. 9Di Yakob ben kmoto fu Padan-Aram, Gado ben sori ensrefi baka na en. A blesi en dan A taigi en taki: 10“Yakob yu nen. Ma den no sa kari yu Yakob moro langa. Yu nen sa de Israel. Dan Gado gi en a nen fu Israel.” 11Gado taigi en moro fara taki: “Mi na Gado, di abi ala makti. Meki furu pikin. Den bakapikin fu yu o tron wan folku, iya, den o tron difrenti folku. Bakapikin fu yu sa de kownu srefi. 12Mi o gi yu a kondre disi di mi pramisi Abraham nanga Isak. Mi o gi en na den bakapikin fu yu.” 13Di Gado kba taki nanga Yakob, A gwe fu drape. 14Yakob poti wan ston tnapu fu memre pe a ben taki nanga Gado. A kanti win na en tapu leki wan ofrandi gi Gado. A kanti oli na en tapu tu. 15Dan a kari a presi pe Gado ben taki nanga en: Betel.
16Baka dati den kmoto na Betel. Di den ben de krosbei fu Efrat, Rachel kisi wan pikin, ma a kisi en nanga furu muiti. 17Di a e pina fu kisi a pikin, a frow di ben e yepi en taigi en taki: “No frede, yu kisi wan boi baka.” 18Ma Rachel firi taki a ben o dede, dat' meki a kari a boi Ben-Oni. Ma en p'pa kari en Benyamin. 19Dan Rachel kon dede. Den beri en na sei a pasi di e go na Efrat. Disi na wan tra nen gi Betlehem. 20Yakob poti wan ston tnapu fu memre pe a ben beri. Te nanga a dei fu tide a ston disi tnapu ete fu sori pe Rachel beri.
21Israel hari go moro fara dan a meki en kampu di a psa Migdal-Eder. 22Di Israel e libi drape, Ruben sribi nanga Bilha, wan fu den frow fu en p'pa. Dan Israel kon yere a sani disi.
Israel ben abi twarfu manpikin. 23Den manpikin fu Lea ben de: Ruben, a fosi boi fu Israel, Simeon, Lefi, Yuda, Isakar nanga Sebulon. 24Den manpikin fu Rachel ben de: Yosef nanga Benyamin. 25Den manpikin fu Bilha, a umasrafu fu Rachel ben de: Dan nanga Naftali. 26Den manpikin fu Silpa, a umasrafu fu Lea ben de: Gad nanga Aser. Disi na den manpikin fu Yakob di a kisi na Padan-Aram.
27Dan Yakob kon doro na en p'pa na Mamre ini Kiryat-Arba. Dati na wan tra nen gi Hebron. Drape Abraham nanga Isak ben libi leki doroseisma. 28Isak libi te leki a ben abi wan hondro nanga aititenti yari. 29Dan en bro koti. Isak dede go na den bigisma fu en. A ben owru èn a ben libi te libi sari en. So den boi fu en, Yakob nanga Esau, kon beri en.
