Genesis 45

₁Dan Yosef no ben man hori ensrefi moro fesi ala den sma di ben drape. A bari taki: “Meki ala sma kmoto fu dyaso.” So no wan tra sma ben drape moro di Yosef kon meki den brada fu en sabi taki en ben de Yosef. ₂A bari sowan krei taki den sma fu Egipte nanga den sma na a oso fu Farao yere. ₃Dan Yosef taigi den brada fu en taki: “Mi na Yosef. Mi p'pa de na libi ete?” Ma den brada fu en ben skreki taki den no ben man piki. ₄Ne Yosef taigi den brada fu en taki: “Un kon moro krosbei.” Di den kon moro krosbei a taigi den taki: “Mi na Yosef. A brada fu unu di un ben seri fu den tyari mi go na Egipte. ₅Ma un no abi fu de ini sowan benawtu èn un no abi fu krutu unsrefi taki un ben seri mi fu den tyari mi kon na Egipte. Bika na Gado ben seni mi go na fesi, fu unu kan tan na libi. ₆Na tu yari angriten de ini a kondre disi kba èn ete feifi yari de fu kon, pe sma no o man wroko gron noso koti nyanyan. ₇Dat' meki Gado ben seni mi go na fesi, fu un kan abi bakapikin na grontapu èn fu hori furu sma na libi gi unu. ₈So a no unu ben seni mi kon dyaso, ma na Gado. A poti mi leki a man di e gi Farao rai. A poti mi tu leki basi fu en oso. A heri kondre Egipte a poti ini mi anu. ₉Un go es'esi na mi p'pa dan un taigi en taki: ‘Yu boi Yosef seni taigi yu taki: Gado poti a heri kondre Egipte ini mi anu. No draidrai, kon es'esi na mi.’ ₁₀Mi o meki yu libi krosbei fu mi ini a kontren fu Gosen. Yu, den pikin fu yu, den granpikin fu yu, den skapu nanga krabita fu yu, den kaw fu yu nanga ala den sani di yu abi. ₁₁Ete feifi yari fu angriten de fu kon, ma mi sa sorgu drape gi yu fu yu no pina. Yu nanga yu famiri nanga ala den tra sma fu yu. ₁₂Luku, unu nanga mi brada Benyamin si nanga un eigi ai taki na misrefi taki nanga unu. ₁₃Ferteri mi p'pa fu a grani di mi abi na Egipte, nanga ala den sani di un si dan un tyari en kon es'esi dyaso.” ₁₄Dan Yosef brasa en brada Benyamin dan a krei. Benyamin srefi krei. ₁₅Yosef ben e krei di a e brasa èn bosi ala den brada fu en. Dan fosi den brada fu en bigin taki nanga en.

₁₆Farao nanga den dinari fu en ben breiti di a nyunsu doro na en oso, taki den brada fu Yosef ben doro. ₁₇Ne Farao taigi Yosef taki: “Taigi den brada fu yu meki den lai nyanyan tapu den meti fu den dan den hari go na Kanaan. ₁₈Den mus tyari den p'pa nanga den ososma fu den kon na mi. Dan mi sa gi den a moro bun pisi fu a kondre Egipte, fu den nyan fu den bun gron.” ₁₉Farao taigi Yosef tu taki: “Yu mus taigi den tu taki den mus go nanga wagi fu Egipte, fu tyari den pikin nanga den frow fu den kon. Den mus tyari den p'pa kon dyaso tu. ₂₀Den no abi fu sari fu libi den sani fu den na baka, bika den sa kisi den moro bun sani fu Egipte.”

₂₁Den manpikin fu Israel du leki fa den ben taigi den fu du. Yosef gi den wagi leki fa Farao ben komanderi. A gi den nyanyan tu gi ondropasi. ₂₂A gi den alamala wan diri krosi fu weri. Ma Benyamin a gi dri hondro solfru moni nanga feifi diri krosi. ₂₃A seni tin manburiki go gi en p'pa, di ben e tyari den moro bun sani fu Egipte. Tin umaburiki ben e tyari karu, brede nanga nyanyan gi en p'pa fu te a ben de ondropasi. ₂₄Di den brada fu en ben e gwe, a tyari den afupasi dan a taigi den taki: “Un no meki trobi na pasi.”

₂₅Na so den hari kmoto na Egipte, dan den doro na den p'pa Yakob na Kanaan. ₂₆Den taigi en taki: “Yosef de na libi. A heri kondre Egipte de ini en anu.” Di den taki dati a ben gersi leki a ati fu Yakob ben tan tiri. A no ben man bribi san den taki. ₂₇Ma di den taigi en ala den sani di Yosef ben taki èn di a si den wagi di Yosef ben seni kon fu kon teki en, a ati fu den p'pa Yakob bigin prisiri baka. ₂₈Ne Israel taki: “A nofo. Mi boi Yosef de na libi ete. Mi wani go si en fosi mi dede.”