1Ma arki now, Yakob, Mi knekti,
Israel, di Mi teki spesrutu.
2Na disi MASRA, di meki yu, e taki,
En di meki yu nanga En anu sensi ini yu m'ma bere,
En di e yepi yu:
No frede, Mi knekti Yakob,
Mi teki yu spesrutu, Yesurun.
3Bika Mi sa kanti bogobogo watra tapu a gron di e angri fu watra,
nanga liba tapu drei gron.
Mi sa kanti Mi Yeye bogobogo tapu den bakapikin fu yu,
nanga Mi blesi tapu den wan di e kon na yu baka.
4Den o sproiti na mindri a grasi,
den o gro leki bon sei den kriki.
5Wan o taki: “Mi na fu MASRA!”
Wan trawan o teki a nen fu Yakob.
Ete wan trawan o skrifi tapu en anu taki:
“Mi na fu MASRA,”
èn a o meki sma kari en Israel.
Masra wawan de Gado
6Na disi MASRA e taki,
a Kownu nanga Ferlusuman fu Israel,
MASRA fu ala sani:
Mi de a fosiwan nanga a kriboiwan,
boiti Mi tra Gado no de!
7Suma de leki Mi?
Meki a taki en, meki a ferteri en lontu.
Meki a brokobroko gi Mi san ben o psa
sensi di Mi meki libisma
èn meki a ferteri un tu san de fu kon.
8Un no skreki! Un no frede!
Mi meki un yere a sani disi someni langa kba.
Unu na Mi ketoigi.
Boiti Mi, tra Gado no de.
Wan Bergiston leki Mi no de.
Mi no sabi no wan.
9Den sma di e meki popki fu kruktu gado, den alamala na sososani. Den sani di den meki, di warti sote gi den, no man du noti gi den. Den sma srefi na ketoigi fu dati, tak' den sani no e si noti, èn tak' den no sabi noti. Na syen den sani e gi den. 10Suma o meki wan popki fu wan kruktu gado nanga en anu, sondro fu a sani kan du wan sani gi en? 11Yere, ala den sma di e waka na den baka o kon na syen, bika den sma di meki den na libisma. Meki den alamala kon na wan, meki den go tnapu fesi krutubakra. Den o skreki te fu dede, den alamala o kon na syen.
12Wan smeti abi en wrokosani nanga san a e wroko isri ini faya. Nanga ambra a e naki a isri poti fa a wani nanga en tranga anu. Ma ensrefi angri e kiri èn a e kon swaki, efu a no dringi watra a e firi flaw. 13A temreman e marki nanga en wrokosani o bigi a popki mus de, dan a e marki nanga wan beitel pe a mus koti. Baka dati a e koti en puru nanga wan fini nefi èn nanga wrokosani a e meki a kon gersi wan libisma. A e meki wan moi popki fu poti ini oso.
14A koti sedrebon gi ensrefi, a e teki wan sipresbon noso wan tra bigi bon di a ben meki gro makandra nanga tra bon ini a busi. Kande ensrefi ben prani wan sedrebon ma na alen ben meki a gro go na hei. 15Na den bon dati wan libisma e kapu fu meki faya. Dan a e teki pikinso fu a udu fu meki wan faya fu waran ensrefi, noso fu baka en brede. A e meki wan gado fu a udu tu dan a e boigi gi en. A e meki wan popki fu wan gado dan a e kindi gi en. 16Nanga afu fu a udu a e meki wan faya, tapu san a e bori meti, a e losi meti na en tapu èn a e nyan te a sari en. A e waran ensrefi na a faya dati tu dan a e taki: “Mi e waran misrefi switi, mi e firi a faya.” 17Dan nanga a udu di libi a e meki wan gado, wan popki fu wan gado, dan a e kindi gi en, a e boigi gi en, a e anbegi en dan a e taki: “Ferlusu mi, bika na yu na mi gado.”
18Den no sabi noti èn den no e ferstan noti. Bika den ai tapu, dat' meki den no e si, den ferstan dungru dat' meki den no man denki. 19A no e prakseri srefi san a e du. Sabi no de, a ferstan srefi no de fu a ferstan taki: Nanga afu fu a udu mi meki faya, mi baka brede tapu a krofaya, mi losi mi meti na en tapu èn mi nyan. Dan fa mi kan teki a udu di libi fu meki wan groskin sani? Fa mi kan kindi gi wan pisi udu? 20A sma di e poti en fertrow tapu udu di kan tron asisi, e bedrigi en eigi ati. Den kruktu prakseri fu en meki taki a lasi pasi. Ensrefi no man du noti fu yepi ensrefi èn a no e aksi ensrefi tu taki: “A no bedrigi a sani di mi hori ini mi anu e bedrigi mi?”
21Poti prakseri tapu den sani disi Yakob,
bika yu na Mi knekti, Israel.
Na Mi meki yu nanga Mi anu.
Yu na a knekti fu Mi.
Israel, Mi no fergiti yu.
22Mi e wai den kruktudu fu yu gwe,
leki fa winti e wai wan wolku gwe,
bro den sondu fu yu e gwe leki a dow.
Un drai kon baka na Mi,
bika na Mi ferlusu unu.
23Heimel, un singi fu prisiri,
bika MASRA du en!
Bari en kon na doro, dipi fu grontapu!
Bergi, busi nanga ala den bon fu yu,
un broko ini prisiri!
Bika MASRA ferlusu Yakob,
ini Israel A e sori a glori fu En.
Na MASRA meki ala sani èn na En e tiri ala sani di e psa
24Na so MASRA, yu Ferlusuman taki,
a Wan di meki un nanga En anu sensi ini un m'ma bere:
Na Mi na MASRA di meki ala den sani disi:
Na Mi hari a heimel poti leki fa a de,
Mi wawan.
Na Mi naki grontapu poti leki fa a de, nanga Mi krakti wawan.
25Na Mi e meki tak' den sani no e psa
di den lei mofo profeiti taki tak' o psa.
Na Mi e meki den koniman hari go nanga baka
te Mi meki a sabi fu den tron lawlaw sani.
26Na Mi tnapu baka den sani di Mi knekti e taki,
èn na Mi e meki den sani psa san den boskopuman fu Mi taki.
Na Mi e taigi Yerusalem taki:
“Sma e kon tan baka na ini yu!”
Den foto fu Yuda Mi e taigi taki:
“Un o meki baka! San ben broko trowe na gron o bow baka.”
27Na Mi e taigi a dipi se taki:
“Drei gwe! Mi e meki den liba fu yu drei gwe.”
28Na Mi e taki fu Cyrus taki:
“Disi na a wan di Mi teki leki skapuman.
A wan di o du ala san Mi wani,
di o taki fu den bow Yerusalem baka,
èn di o taki fu den seti a fundamenti fu a tempel.”
