1Tye, efu mi ede ben kan de wan sula,
den ai fu mi wan peti fu watra-ai,
dei nanga neti mi ben o krei,
krei gi a lobi pipel fu Mi fu mi di lasi den libi.
2Tye, efu mi ben sabi wan presi ini a bigi dreisabana,
wan presi fu psa a neti,
dan mi ben o kmopo na mindri a pipel fu mi,
mi ben o gwe libi den.”
“Bika den alamala na sma di e huru,
wan bigi grupu bedrigiman.
3Den tongo de leki wan bo,
soso lei e sutu kmoto ini den mofo.
Den e kisi moro nanga moro makti ini a kondre,
ma den e kon ogri moro nanga moro tu.
Fu Mi dati den no wani sabi not'noti,
Na so MASRA taki.
4Ibri wan fu unu mus de na ai gi a sma di e libi na en sei,
èn un no mus fertrow na tapu un brada srefi.
bika ibri brada na wan bedrigiman leki Yakob,
èn ibri mati e waka lontu e taki takru fu yu.
5A wan e kori a trawan èn den no e taki a tru.
Den gwenti den tongo fu lei nanga fu bedrigi.
Den no o tapu fu sondu.
6Den e tan pina sma nomo,
den e kori sma go nanga langa.
Den no wani sabi Mi leki den Gado,
Na so MASRA taki.
7Dat' meki, na disi MASRA fu ala sani e taki:
Yere, Mi o tesi den nanga bigi ogri,
leki fa den e tesi solfru nanga faya.
Bika Mi no kan du no wan tra sani moro nanga a lobi pipel fu Mi.
8A tongo fu den de leki peiri di e kiri,
a mofo fu den e puru soso bedrigi kon na doro.
Den e taigi a trawan taki den e winsi taki sani sa go bun nanga en,
ma ini den ati den e luru a trawan fu kiri en.
9Mi sa strafu den nomonomo fu dati,
Na so MASRA taki,
Mi mus fu puru atibron tapu sowan folku.”
10“Mi e opo wan sari singi gi den bergi,
mi e singi wan dede-oso singi gi den wei.
Bika ala den sani di ben gro drape dede gwe,
no wan sma no e psa drape moro,
srefi a babari fu meti no de fu yere moro.
Den fowru di e frei na loktu
nanga den meti di ben nyan grasi drape, lowe.”
11“Masra e taki:
Mi o broko Yerusalem pisipisi te na gron,
wan presi pe krasi meti o libi.
Mi o meki den foto fu Yuda o tron broko pranasi,
no wan sma o libi moro na den ini.
12Suma koni so tak' a e ferstan a sani dati?
Gi suma MASRA tyari en kon na krin dati a kan ferteri trawan?”
“Fa a kondre du broko èn drei gwe leki a bigi dreisabana? No wan sma no e hari psa moro na ini.” 13MASRA srefi e piki taki: “Na fu di den no hori den na a wèt di Mi gi den. Na fu di den no arki san Mi taigi den èn libi nanga dati. 14Ma den libi soleki fa a takru ati fu den gi den. Den go waka baka den Baal soleki fa den afo fu den leri den. 15Dat' meki, na disi MASRA fu ala sani, a Gado fu Israel, e taki: Yere, Mi o gi den wan bita sani fu den nyan, èn Mi o gi den watra nanga dresi fu dringi di kan kiri den. 16Mi e panya den go mindri folku di, no den, no den afo fu den, ben sabi. Mi e meki feyanti go na den baka fu feti nanga den te leki Mi wai den alamala puru na pasi.
A pipel mus meki ensrefi klari fu low
17Na disi MASRA fu ala sani e taki:
Un luku bun san e psa.
Un seni kari den umasma di e singi dede-oso singi fu den kon.
Un seni boskopu gi den uma di sabi san den mus du fu den kon.
18Meki den kon es'esi fu kon singi wan dede-oso singi gi unu,
fu watra lon kmopo fu un ai leki wan liba.
19Wan dede-oso singi de fu yere ini Sion.
‘Tye, ala sani fu un pori.
Syen naki un sote fu di un ben abi fu gwe libi un kondre,
ala den oso fu un den broko.’
20Uma, un arki den wortu fu MASRA,
un kaka un yesi fu yere san A e taki.
Un leri den umapikin fu un fu krei,
èn un leri den fu singi a dede-oso singi disi:
21‘Bika dede kren na den fensre kon ini un oso,
a kon ini den kownu-oso fu unu.
A e kiri den pikin fu unu na strati,
sosrefi den yonkuman tapu den pren.’
22Yeremia, taki! Na so MASRA taki:
Den dedeskin fu den sma o didon leki mest ini a wei,
leki groto di den koti libi ini bosu ini den pranigron,
ma di no wan sma go piki.
23Na disi MASRA e taki:
A koniman no mus meki bigi taki a koni,
a sma di tranga no mus meki bigi taki a tranga,
èn a guduman no mus meki bigi taki a gudu.
24Ma efu sma wani meki bigi,
dan a mus meki bigi taki a sabi Mi bun,
taki a sabi taki Mi na MASRA,
di no e kba fu sori lobi,
di e du sani nanga leti
èn di e meki sani psa tapu wan leti fasi na grontapu.
Bika na den sani dati e gi Mi prisiri,
na so MASRA taki.
25Un yere, den dei e kon, Na so MASRA taki, dati Mi o strafu ala den folku di besnei, ma den e libi leki sma di no besnei. 26Mi o strafu den sma fu Egipte, den sma fu Yuda, den sma fu Edom, den Amonitisma, den sma fu Moab, nanga den sma fu a bigi dreisabana di e piri den sei ede. Bika ala den folku dati de leki Israel. Den na sma di no sabi Mi.
